نئے اسلامی سال 1440 ہجری کا آغاز، یوم عاشور 21 ستمبر کو ہوگا -
The news is by your side.

Advertisement

نئے اسلامی سال 1440 ہجری کا آغاز، یوم عاشور 21 ستمبر کو ہوگا

جلوس اور مجالس کی نگرانی کے لیے فول پروف سیکیورٹی کے انتظامات کیے جائیں گے

کراچی: محرم الحرام کا چاند نظر آگیا، جس کے بعد نئے اسلامی سال 1440 ہجری کا آغاز ہوگیا، ملک بھر میں یوم عاشور بروز جمعہ 21 ستمبر کو مذہبی عقیدت و احترام کے ساتھ منایا جائے گا۔

اسلامی مہینے ذوالحج کے 30 دن مکمل ہوتے ہی مغرب کے بعد نئے اسلامی سال کے پہلے ماہ محرم الحرام کا آغاز ہوا، جس کے بعد مختلف مساجد اور امام بارگاہوں میں مجالس عزا کا انعقاد کیا جائے گا جو یوم عاشور یعنی 10 محرم کے غروب آفتاب تک جاری رہے گا۔

یاد رہے کہ گزشتہ روز مفتی منیب الرحمان کی سربراہی میں رویت ہلال کمیٹی اجلاس کا انعقاد کراچی میں کیا گیا تھا جس میں وزارتِ مذہبی امور، محکمہ موسمیات سمیت زونل کمیٹی کے اراکین نے شرکت کی تھی۔

مزید پڑھیں: وزیر اعلیٰ کی محرم میں حساس اضلاع میں سیکیورٹی بہتر کرنے کی ہدایت

مرکزی اجلاس کے علاوہ ملک کے مختلف علاقوں میں لاہور، کوئٹہ، پشاور میں زونل کمیٹیوں کا اجلاس ہوا تھا جس میں محرم الحرام کا چاند دیکھنے کی کوئی شہادت موصول نہیں ہوئی تھی۔

اجلاس کے بعد میڈیا سے گفتگو کرتے ہوئے چیئرمین رویت ہلال کمیٹی نے اعلان کیا تھا کہ ملک بھر میں محرم الحرام کا چاند کہیں نظر نہیں آیا، لہٰذا یکم محرم الحرام بروز بدھ12ستمبر کو ہوگی اور یوم عاشور بروز جمعہ21ستمبر کو ہوگا۔

اس موقع پر انہوں نے دعا کی تھی کہ ماہ محرم ملک بھر میں امن و امان کے ساتھ گزر جائے کیونکہ موجودہ حالات میں پاکستان کو امن و سلامتی کی بہت زیادہ ضرورت ہے۔

یہ بھی پڑھیں: محرم الحرام امن و امان کے ساتھ گزر جائے، مفتی منیب

دوسری جانب ملک بھر میں محرم الحرام کے دوران سیکیورٹی کے سخت انتظامات کئے جائیں گے۔ امن و امان کی صورتحال کو کنٹرول میں رکھنے کے لیے  وفاقی دارالحکومت اسلام آباد اور کراچی میں بھی مجالس اور جلوسوں کے فول پروف انتظامات کیے جائیں گے۔

ذرائع کے مطابق حساس مقامات کی سیکیورٹی کے لئے ہزاروں اہلکاروں کو تعینات کیا جائے گا۔ اس کے علاوہ بم ڈسپوزل اسکواڈ مجالس اور جلوس کی گزر گاہوں کی تلاشی کے بعد انہیں کلیئر قرار دے گا جس کے بعد وہاں  کی سیکیورٹی رینجرز اور پولیس کے حوالے کردی جائے گی۔

یاد رہے کہ یکم محرم الحرام کو خلیفہ دوئم حضرت عمر فاروق رضی اللہ تعالیٰ عنہ کی شہادت کا دن منایا جاتا ہے علاوہ ازیں شہداء کربلا کی یاد میں تعزیتی مجالس کا انعقاد بھی کیا جاتا ہے۔

Comments

comments

یہ بھی پڑھیں