اسلام آباد: گرفتار پی ٹی آّئی رہنما شہبازگل کےعلاج معالجےکیلئے نیا میڈیکل بورڈ بنانے کا فیصلہ کیا گیا ہے۔
ذرائع کے مطابق چار رکنی میڈیکل بورڈ پمزاسپتال کےڈاکٹرز پرمشتمل ہو گا، بورڈ میں میڈیسن، جنرل سرجری، پلمانولوجی، میڈیکل آئی سی یو کے ڈاکٹرز شامل کئے گئے ہیں۔
ذرائع کا کہنا ہے کہ ایسوسی ایٹ پروفیسر میڈیسن شفاعت رسول کو میڈیکل بورڈ کی سربراہ مقرر کیا گیا ہے، جنرل سرجن عاطف انعام شامی، پلمونولوجسٹ ڈاکٹرضیا اور میڈیکل آئی سی یو کےاسسٹنٹ پروفیسر ڈاکٹرسلمان کو بھی بورڈ میں شامل کیا گیا ہے۔
پمز ذرائع کے مطابق چار رکنی بورڈشہباز گل کا علاج معالجہ اور میڈیکل رپورٹ تیار کرے گا، میڈیکل رپورٹ کو عدالت میں پیش کیا جائے گیا۔
واضح رہے کہ اس سے قبل شہباز گل کیلئے چار رکنی اور بعد میں چھ رکنی بورڈ بنایا گیا تھا۔
یہ بھی پڑھیں: ڈاکٹروں کا شہباز گل کی سٹی پلمونری اینجیو گرافی کرانے کا فیصلہ
اس سے قبل پمز اسپتال کی جانب سے تحریک انصاف کے رہنما شہباز گل کی صحت کے حوالے سے بتایا گیا ہے کہ شہبازگل کے معمول کےکلینیکل ٹیسٹ کیےجا رہے ہیں، ان کو چیسٹ انفیکشن، جسم درد اور گلے میں خراش کی شکایت ہے۔
پمز اسپتال کا کہنا تھا کہ شہباز گل کا بلڈ پریشر ، شوگر، دھڑکن اور نبض کی رفتار معمول کے مطابق ہے۔
پمز اسپتال کا کہنا ہے کہ شہبازگل کو اسپتال سے پرہیزی کھانا فراہم کیا جا رہا ہے، وہ کمرے میں صبح اور شام چہل قدمی کرتے ہیں۔
