The news is by your side.

Advertisement

معروف گلوکارہ بارباڈوس کی قومی ہیرو قرار دے دی گئیں

شمالی امریکی کیریبیئن ملک بارباڈوس نے معروف پاپ گلوکارہ ریحانا کو سرکاری سطح پر قومی ہیرو قرار دے دیا جبکہ ملک کے نام کے ساتھ بھی جمہوری کا لفظ لگا دیا۔

بارباڈوس کی وزیر اعظم نے 29 اور 30 نومبر کی درمیانی شب کو ہونے والی تقریب میں گلوکارہ کو سرکاری اعزاز سے نوازا۔ ریحانا جزیرہ نما بارباڈوس کی 150 سالہ تاریخی کی دوسری خاتون بن گئیں جنہیں حکومت نے قومی ہیرو کا درجہ دیا ہے۔

اس سے قبل 1866 میں سارا این گل نامی مذہبی اسکالر خاتون کو قومی ہیرو قرار دیا گیا تھا، یہی نہیں بلکہ ریحانا زندہ افراد میں وہ دوسری شخصیت بن گئیں، جنہیں ملک و قوم کے سرکاری قومی ہیرو کا درجہ حاصل ہوگا۔

ان سے قبل 85 سالہ کرکٹر سر گار فیلڈ کو بھی قومی ہیرو کا درجہ حاصل ہے اور انہیں بھی کئی سال قبل مذکورہ اعزاز دیا گیا تھا۔

ریحانا کو قومی ہیرو قرار دیے جانے اور اس کا میڈل دینے کی تقریب میں وزیر اعظم میا امور موتلے نے انہیں ملک و قوم کا فخر قرار دیتے ہوئے ایوارڈ اور سند پیش کی۔

بارباڈوس کی حکومت نے ستمبر 2018 میں ریحانا کو صحت و تعلیم سے متعلق سفیر بھی مقرر کیا تھا جبکہ انہیں متعدد ایوارڈز سے بھی نوازا جا چکا ہے۔

بارباڈوس کی حکومت نے ایک طرف ریحانا کو قومی ہیرو قرار دیا، وہیں حکومت نے ملکہ برطانیہ الزبتھ دوئم کا نام بھی اعزازی ریاستی سربراہ کے خانے سے نکال دیا جبکہ ملک کے نام میں تبدیلی کرتے ہوئے ملک کا سرکاری نام جمہوریہ بارباڈوس رکھ دیا۔

ملکہ برطانیہ بارباڈوس کی اعزازی سربراہ تھیں جو گزشتہ 70 سال سے وہاں کے آئین میں بارباڈوس کے سربراہ کے طور پر شامل تھیں۔

بارباڈوس ماضی میں سلطنت برطانیہ کے قبضے میں رہ چکا ہے اور اسے بھی دیگر ممالک کی طرح برطانیہ نے 1966 میں آزادی دی تھی۔

Comments

یہ بھی پڑھیں