ماسکو : روس کے نووسیبیرسک ریسرچ سینٹر کی دوسری ویکسین ایپی ویک کورونا تیاری کے آخری مراحل میں ہے، جس کے کلینکل ٹرائلز رضاکاروں پر کیے جارہے ہیں۔
اس حوالے سے روس کی سینیٹری نگرانی کی پریس سروس نے کہا ہے کہ روس کی جانب سے تیار کردہ دوسری ایپی ویک کورونا ویکسین کو رجسٹریشن کے عمل کے بعد انسانی آزمائشوں کی غرض سے 60سال سے زائد عمر کے پہلے پانچ افراد کو لگادی گئی ہے۔
سینیٹری واچ ڈاگ کے مطابق 60سال سے زیدہ عمر والے 150رضاکار پہلے ہی ٹرائلز کیلئے منتخب ہوچکے ہیں، جبکہ 18سے 60سال کے درمیان کے رضاکاروں کا انتخاب جاری ہے۔ ویکسین ٹیسٹوں میں 3000کے قریب رضاکار حصہ لیں گے۔
یاد رہے کہ ویکو لوجی اور بائیو ٹیکنالوجی کے ویکر اسٹیٹ ریسرچ سینٹر کے ذریعے یہ ویکسین تیار کی گئی تھی جبکہ 24جولائی کو مرکز نے رضاکاروں پر اینٹی کورونا ویکسین کے کلینکل آزمائشوں کیلئے روسی وزارت صحت کی اجازت حاصل تھی۔
اس سے قبل سعودی عرب میں ہونے والی جی-20 سربراہ اجلاس سے خطاب کرتے ہوئے روسی صدر ولادیمیر پوٹن نے ضروت مند ممالک کو روس میں تیار کردہ کورونا ویکسین اسپوٹنک وی کی فراہمی کی پیشکش کی تھی۔
ورچوئل اجلاس سے آن لائن خطاب کرتے ہوئے روس کے صدر ولادیمیر پوٹن نے دنیا کے ضروت مند ممالک کو پیشکش کرتے ہوئے کہا کہ ہر شخص کو مؤثر اور محفوظ کورونا ویکسین فراہم ہونی چاہیئے جس کے لیے روس ضرورت مند ممالک کو اپنی خدمات پیش کرتا ہے۔
روس کے صدر کا مزید کہنا تھا کہ جی-20 کے اس اجلاس کے دنیا کو منصفانہ طور پر موثر اور محفوظ کورونا ویکیسن کی فراہمی کے مسودے کے حامی ہیں اور ضرورت مند ممالک کو اپنی کورونا ویکسین ‘اسپوٹنک وی’ فراہم کرنے کے لیے تیار ہیں۔
اس کے علاوہ نووسیبیرسک ریسرچ سینٹر کی دوسری اینبٹی کورونا ویکسین ‘ایپی ویک کورونا’ بھی تیار ہے اسی طرح روس میں تیسری ویکسین کی بھی تیاری آخری مرحلے میں ہے۔
