نئی دہلی : بھارتی شہری کرونا وائرس کی نئی قسم میں مبتلا ہونے لگے، تاہم نئی قسم کے پہلے سے موجود وائرس سے زیادہ خطرناک ہونے کے ثبوت نہیں ملے۔
غیر ملکی خبر رساں ادارے کی رپورٹ کے مطابق پڑوسی ملک بھارت میں مہلک ترین وبا کرونا وائرس کی نئی قسم دریافت ہوئی ہے جسے ماہرین کی جانب سے ’ڈبل میوٹنٹ‘ کا نام دیا گیا ہے۔
میڈیا رپورٹس میں بتایا گیا ہے کہ نئی قسم بھارتی ریاست مہارشٹرا میں سامنے آئی، ریاست بھر سے لیے گئے نمونوں میں سے دو سو میں ڈبل میوٹنٹ قسم پائی۔
بھارتی حکام کا کہنا ہے کہ تاحال یہ قسم شہریوں میں اتنی بڑی تعداد میں نہیں پایا گیا، اور ابھی تک اس بات کے بھی ثبوت نہیں ملے ہیں کہ کرونا وائرس کی یہ نئی قسم پہلے سے پائے جانے والے وائرس کی نسبت زیادہ خطرناک ہے یا نہیں۔
ماہرین کا کہنا ہے کہ اس قسم کو ڈبل میوٹنٹ اس لیے کہا جاتا ہے کہ اس میں پہلے سے دریافت شدہ کورونا وائرس کی دو قسموں کی خصوصیات موجود ہیں۔
