کراچی : شہر قائد میں نیو ایئر نائٹ کے موقع پر سندھ رینجرز نے سیکیورٹی کے سخت انتظامات کیے ہیں، کراچی اور اندرون سندھ اسنیپ چیکنگ کی جارہی ہے۔
تفصیلات کے مطابق کراچی میں نیو ایئرکے حوالے سے سیکیورٹی کے انتظامات مکمل کرلیے گئے ہیں، اس حوالے سے ترجمان سندھ رینجرز کا کہنا ہے کہ کراچی کی اہم شاہراہوں پر رینجرز کی جانب سے موٹرسائیکل اسکواڈ تشکیل دے دیا گیا ہے۔
کراچی سمیت اندرون سندھ میں اسنیپ چیکنگ کی جارہی ہے، موبائل پٹرولنگ اور موٹر سائیکل گشت کو مزید بڑھا دیا گیا ہے، رینجرز کی بھاری نفری کراچی سمیت اندرون سندھ میں گشت پر موجود رہے گی۔
ہوائی فائرنگ اور کسی بھی قسم کے اسلحے کی نمائش پر بھی مکمل پابندی ہوگی، عوام سے اپیل ہے کہ امن و امان کو برقرار رکھنے کیلئے بھرپور تعاون کریں۔
ترجمان سندھ رینجرز نے شہریوں سے اپیل کی کہ ہوائی فائرنگ اور اسلحے کی نمائش اور خطرناک ڈرائیونگ سے گریز کریں، خلاف ورزی پر فوری اورسخت قانونی کارروائی عمل میں لائی جائے گی۔
ترجمان کا مزید کہنا ہے کہ کسی بھی ناخوشگوار واقعے اور مشکوک سرگرمی میں ملوث عناصر کی اطلاع فوری طور پر رینجرز ہیلپ لائن پر دیں۔