ون وے، تیزفتاری اور ٹریفک لین کی خلاف ورزی پر بھی کارروائی ہوگی کراچی : ٹریفک پولیس نے نیوایئر نائٹ کے لیے ٹریفک پلان جاری کردیا، شہریوں کیلئے نیو ائیرنائٹ پر کسی شاہراہ کو بند نہیں کیا جائے گا۔
اس حوالے سے کمشنرکراچی کا کہنا ہے کہ ہوائی فائرنگ پر سخت پابندی ہوگی، خلاف ورزی کرنے والوں کیخلاف دفعہ144 کے تحت کارروائی کی جائے گی۔
نیو ائیرنائٹ سے متعلق روٹ پلان جاری کرتے ہوئے ٹریفک پولیس حکام کا کہنا ہے کہ سال نو کی خوشی میں شہریوں کی بڑی تعداد تفریحی مقامات کارخ کرے گی، شہریوں کیلئے نیوائیرنائٹ پر کسی شاہراہ کو بند نہیں کیا جائے گا۔
۔ ٹریفک پولیس کے روٹ پلان کے مطابق سائلنسر نکال کر موٹرسائیکل چلانے والوں کو پولیس کے حوالے کیا جائے گا،ون وے، تیزفتاری اور ٹریفک لین کی خلاف ورزی پر بھی کارروائی ہوگی۔
ٹریفک پلان کے مطابق سی ویو سے متصل روڈ پر ٹریفک یکطرفہ چلےگی، سی ویو، شارع فیصل، عبداللہ ہارون روڈ، ضیاالدین احمد روڈ پر پارکنگ ممنوع ہوگی، اس کے علاوہ مائی کلاچی، کورنگی،ایم ٹی خان روڈ پربھی گاڑیوں کی پارکنگ کی اجازت نہیں ہوگی۔
پولیس حکام کا مزید کہنا ہے کہ نیو ائیرنائٹ کے موقع پر تمام ہیوی ٹریفک کو شام چھ بجے سے شہر میں داخلے کی اجازت نہیں دی جائے گی۔
