The news is by your side.

Advertisement

دوسرا ون ڈے : نیوزی لینڈ نے پاکستان کوشکست دے دی

نیلسن : نیوزی لینڈ نے پاکستان کو پانچ ون ڈے میچوں کی سیریز کے دوسرے میچ میں آٹھ وکٹوں سے شکست دے کر سیریز میں دو صفر کی برتری حاصل کرلی۔

تفصیلات کے مطابق نیلسن میں کھیلے جانے والے دوسرے ون ڈے میچ میں پاکستان نے پہلے کھیلتے ہوئے نیوزی لینڈ کو 247 رنز کا ہدف دیا۔

بارش کے باعث نیوزی لینڈ کی اننگز25 اوورز تک محدود کردی گئی اور اسے فتح کے لیے 151 رنز کا ہدف ملا جو اس نے با آسانی دو وکٹوں کے نقصان پر 24 ویں اوور میں حاصل کرلیا۔

میزبان ٹیم کی جانب سے مارٹن گپٹل نے جارحانہ بلے بازی کا مظاہرہ کیا اور پانچ چوکوں اور پانچ چھکوں کی مدد سے 71 گیندوں پر 86 رنز کی اننگزکھیلی جبکہ راس ٹیلر نے 45 رنز کی اہم اننگز کھیلی۔

نیوزی لینڈ کو اننگزکے پہلے ہی اوورمیں نقصان اٹھانا پڑا جب محمد عامر کی گیند پرکولن منرو بغیر کوئی رن بنائے کیچ آؤٹ ہوگئے۔

میزبان ٹیم کی دوسری وکٹ 47 رنز پرگری جب کپتان کین ولیمسن 19 رنزبناکر فہیم اشرف کا شکار بنے۔

بعدازاں مارٹن گپٹل اور راس ٹیلر نے 104 رنز کی شراکت قائم کی اور اپنی ٹیم کو فتح دلوا دی۔

اس سے قبل پاکستان نے ٹاس جیت کر بیٹنگ کا فیصلہ کیا تواننگز کے آغاز میں اظہرعلی 6 رنز بنا کرٹم ساؤتھی کی گیند پر ایل بی ڈبلیو ہوئے جبکہ امام الحق بھی صرف 2 رنز ہی بناسکے اور ٹرینٹ بولٹ کا شکار بنے۔

بابراعظم 10 رنز بنا سکے اور لوکی فرگوسن کی گیند پرآؤٹ ہوئے جبکہ شعیب ملک 27 اور کپتان سرفراز احمد صرف 3 رنز بناکر اسپنر ٹوڈ ایسل کا شکار بنے۔

محمد حفیظ 60 رنز بناکر مچل سینٹنر کی گیند پر کیچ آؤٹ ہوئے اور فہیم اشرف بھی 7 رنز بناکر لوکی فرگوسن کی گیند پر آؤٹ ہوئے۔

حسن علی نے اپنے ون ڈے کیریئر کی پہلی نصف سنچری بنائی اور 51 رنز پر ٹم ساؤتھی کی گیند پرکیچ آؤٹ ہوئے جبکہ شاداب خان نے بھی 52 رنز اسکور کیے اور وہ لوگی فرگوسن کی گیند پر آؤٹ ہوئے۔

محمد عامر نے 8 اور رومان رئیس 6 رنز بنائے اور ناٹ آؤٹ رہے۔

واضح رہے کہ پاکستان ٹیم میں ایک تبدیلی کی گئی جس میں فخرزمان کی جگہ امام الحق کو ٹیم میں شامل کیا گیا۔


اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

Print Friendly, PDF & Email

Comments

comments

یہ بھی پڑھیں