وزارتِ داخلہ اورایف آئی اے نے اعلان کیا ہے کہ دوہری شہریت کے حامل اوورسیز پاکستانی اپنے نائیکوپ ( بیرون ملک مقیم شہریوں کو جاری کیا جانے والا کارڈ)کارڈکے بغیر بھی پاکستان میں بغیر ویزے کے انٹری حاصل کرسکیں گے۔
تفصیلات کےمطابق وزارتِ داخلہ اور ایف آئی اے امیگریشن ونگ کی جانب سے جاری کردہ مشترکہ اعلامیے میں کہا گیا ہے کہ غیر ملکی پاسپورٹ پر وطن عزیز آنے والے پاکستانی ‘ ملک میں بغیر ویزے کے انٹری حاصل کرسکیں گے‘ اور اپنا نائیکوپ یہی سے حاصل کرسکیں گے۔
انٹری کے لیے جو شرائط وضع کی گئی ہیں ان کے تحت مسافر کے پاس بیرونِ ملک سے نائیکوپ کارڈ کی تجدید کے لیے دی گئی درخواست کی رسید ہونا بھی کافی ہے۔
ایک اور صورت یہ ہے کہ مسافر ایئر پورٹ پر ایف آئی حکام سے رابطہ کرے اور اپنی پاکستانی شہریت ثابت کرکے لینڈنگ پرمٹ حاصل کرے۔ یہ پرمٹ آئندہ 72 گھنٹے کے لیے کارآمد ہوگا۔ اس اثنا ء میں مسافر کو نادرا سنٹر جاکر اپنے نائیکوپ کی تجدید کرانا ہوگی‘ اس سلسلے میں مسافر ایئرپورٹ پر موجود نادرا سنٹر سے بھی رابطہ کرسکتا ہےاور اپنے قریبی مرکز بھی جاسکتا ہے۔
پاکستانی شہریت ثابت کرنے کے لیے زائد المعیاد نائیکوپ کارڈ‘ شناختی کارڈ ‘ والدین کے شناختی کارڈ ‘ پاکستانی شریکِ حیات کا شناختی کارڈ اور میرج سرٹیفکٹ یا اسی نوعیت کی کوئی دوسری دستاویز پیش کرنا ہوگی جو کہ مسافر کا پاکستان کا شہری ثابت کرتی ہوں۔
اعلامیے میں کہا گیا ہے کہ بیرونِ ملک مقیم پاکستانی ملک و قوم کا اثاثہ ہیں اور انہیں پاکستان میں خوش آمدید کہا جائے گا اور بھرپور کوشش کی جائے گی کہ ملک میں داخلے اور اخراج کے وقت انہیں کسی قسم کی دشواری کا سامنا نہ کرنا پڑے۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کےلیے سوشل میڈیا پرشیئر کریں
