ابوجا: نائیجیریا کے سائنس دانوں نے دعویٰ کیا ہے کہ انہوں نے کرونا کو روکنے میں مدد دینے کے لیے ایک منفرد ویکسین دریافت کی ہے۔
تفصیلات کے مطابق کرونا وائرس کے خلاف ویکسین کی تیاری اس مہلک وبا پر قابو پاسکتی ہے، دنیا بھر میں ماہرین اس مقصد کے لیے پوری تندہی سے کوشاں ہیں۔
نئے وائرس کو وِڈ نائنٹین سے 213 ممالک میں اب تک 4 لاکھ 70 ہزار 795 جان کی بازی ہار چکے ہیں،ایسے میں نائیجیریا سے کرونا وائرس کی ویکسین کے حوالے سے بڑی خبر سامنے آئی ہے۔
نائیجیریا کے مقامی میڈیا کے مطابق سائنس دانوں کی جانب سے دریافت کی گئی منفرد ویکسین کرونا وائرس کے انفیکشن کو روکنے میں مدد گار ثابت ہوسکتی ہے۔
ویکسین سے متعلق تحقیق کرنے والی ٹیم کے سربراہ ڈاکٹر اولادیپو کولاول نے نیوز کانفرنس کے دوران بتایا کہ یہ ویکسین مقامی سطح پر افریقا کے لوگوں کے لیے تیار کی گئی ہے۔
پریس کانفرنس کے دوران ڈاکٹر اولادیپو کولاول کا کہنا تھا کہ طبی ماہرین کی ٹیم کو ویکسین دریافت کرنے کے حوالے سے کی جانے والی تحقیق کے لیے 20 ہزار ڈالر ملے۔
انہوں نے بتایا کہ اس منفرد ویکسین کی وسیع پیمانے پر استعمال اور عوام تک رسائی میں کم از کم 18 ماہ لگیں گے کیونکہ اس ویکسین کے لیے حکومت کی جانب سے منظوری درکار ہوگی۔
نائیجیرین سائنس دانوں کے مطابق کرونا کے لیے دریافت کی گئی منفرد ویکسین کو متعدد بار ٹیسٹ کیا گیا ہے،یہ جعلی نہیں ہوسکتی، اس ویکسین کو خاص طور پر افریقی شہریوں کے لیے بنایا گیا لیکن یہ ویکسین دوسروں کے لیے بھی کارآمد ثابت ہوسکتی ہے۔
