The news is by your side.

Advertisement

عید قرباں: صدر مملکت اور وزیراعظم کے خصوصی پیغامات

اسلام آباد: صدرِ مملکت ڈاکٹر عارف علوی اور وزیراعظم عمران خان سمیت دیگر اہم شخصیات نے عیدالاضحیٰ کے موقع پر قوم کو خصوصی پیغامات دئیے اور مبارک بادیں بھی پیش کیں۔

تفصیلات کے مطابق عید قربان کے پُر مسرت موقع پر وزیراعظم عمران خان نے کہا کہ قربانی صرف جانور کے ذبح کرنے کا نام نہیں ہے بلکہ اس کا مقصد انسان کا اپنی خواہشات کو اعلیٰ مقاصد کے حصول کے لئے قربان کرنا ہے۔

وزیراعظم عمران خان نے کہا کہ میں عیدالاضحیٰ کے پرمسرت موقع پر پوری پاکستانی قوم اور عالم اسلام کو مبارکباد پیش کرتا ہوں، اﷲ تعالیٰ سے دعاگو ہوں کہ پاکستانی قوم اور پوری ملت اسلامیہ کی عبادات اور قربانیاں قبول فرمائے۔

اپنے پیغام میں وزیر اعظم کا کہنا تھا کہ دنیا میں کوئی قوم اس وقت تک ترقی نہیں کرسکتی جب تک اس میں ایثار اور قربانی کا جذبہ موجود نہ ہو، قربانی صرف جانور کے ذبح کرنے کا نام نہیں ہے بلکہ اس کا مقصد انسان کا اپنی خواہشات کو اعلیٰ مقاصد کے حصول کے لئے قربان کرنا ہے، یہ جذبہ انسان کے اندر ایسی صلاحیت کو اْجاگر کرنے کا جذبہ مہیا کرتا ہے جو اْسے بڑی سے بڑی مشکل صورتحال میں بھی راہ ِراست سے بھٹکنے نہیں دیتا۔

یہی وہ جذبہ تھا، جس کے تحت پاکستانی قوم نے کرونا وائرس جیسی عالمگیر وبا سے حفاظت بڑی دانشمندی، قومی حکمت عملی اور حوصلہ سے کی ہے، انہوں نے کہا کہ وطن عزیز معاشی لحاظ سے جن مشکل حالات سے دوچار تھا اﷲ تعالیٰ کے فضل وکرم سے اب وہ حالات تبدیل ہو رہے ہیں، ہماری معیشت درست سمت پر آچکی ہے۔

یہ بھی پڑھیں: عیدالاضحیٰ آج مذہبی جوش و جذبے کےساتھ منائی جارہی ہے

وزیراعظم نے کہا کہ حکومتی اقدامات کے نتیجہ میں معاشی اعداد و شمار حوصلہ افزا ہیں، مختلف اسکیموں کے ذریعے لوگوں کو ریلیف فراہم کیا جا رہا ہے۔ وہ دن دور نہیں جب پاکستان ترقی یافتہ ممالک کے ساتھ شانہ بشانہ کھڑا ہو گا اور پوری پاکستانی قوم کا سر اقوام عالم کے سامنے فخر سے بلند ہو گا۔

صدر مملکت ڈاکٹر عارف علوی نے بھی عید الاضحیٰ پر قوم اور عالم اسلام کو مبارکباد دیتے ہوئے کہا کہ اس اسلامی تہوار میں ہمارے لئے یہ درس ہے کہ آزمائش اور امتحان کی صورتحال میں ثابت قدم رہنا اور مقصد کے حصول میں ہر قسم کی قربانی کے لیے تیار رہنا ہی کامیابی کی کنجی ہے۔

صدر مملکت نے قوم سے اپیل کی کہ وہ کرونا وائرس کی وبا میں سرخرو ہونے کیلئے ثابت قدمی کا مظاہرہ کرے اور احتیاطی تدابیر پر عمل جاری رکھے ، عید قربان کے موقع پر قربانی کے جذبے سے سرشار ہو کر غریبوں اور ضرورت مندوں کی بڑھ چڑھ کرمدد کرے۔

گورنر پنجاب کی پاکستانی قوم کو عیدالاضحیٰ کی مبارکباد

گورنرپنجاب چوہدری محمد سرور نے عید کے پرمسرت موقع پر کہا کہ دنیا بھر کے مسلمانوں کو عید کی خوشیاں مبارک ہوں،اپنی خوشیوں میں بے سہارا اور غربا کو ضرور شامل کریں۔

چوہدری محمد سرور نے دہشت گردی کے خلاف جنگ کے شہدا کی عظمت کو سلام پیش کرتے ہوئے کہا کہ آزادی کیلئے قربان کشمیری، فلسطینی بہن بھائیوں کو نہیں بھول سکتے، زندگی کے آخری لمحے تک کشمیری ،فلسطینیوں کےساتھ کھڑےہیں۔

آج ملکر پاکستان کو درپیش چیلنجز سے نجات دلانےکا عہد کرنا ہے، کرونا کےخلاف جنگ ختم نہیں ہوئی، ایس اوپیز پر مکمل عمل کرنا ہے۔

عید الاضحیٰ کے موقع پر وزیراعلیٰ پنجاب کا پیغام

وزیر اعلیٰ پنجاب عثمان بزدار نے قوم کو عیدالاضحی پر مبارکباد دیتے ہوئے کہا کہ عید الاضحی قربانی، ایثار اورخوشیاں بانٹنے کا تہوار ہے، بے سہارا اوریتیموں کو خوشیوں میں شریک کرنا ہی عید کا پیغام ہے۔

سردار عثمان بزدار کا کہنا تھا کہ بحیثیت قوم باہمی رنجشیں واختلافات کو فراموش کرنےکی ضرورت ہے، جھوٹ،منافقت اورغیبت کو ہمیشہ کیلئےقربان کرنےکا عہد کرنا ہوگا۔

وزیراعلیٰ کا مزید کہنا تھا کہ کرونا کی چوتھی لہر کے پیش نظر عید سادگی سےمنانا قومی فریضہ ہے، عید پر ماسک ضرور پہنیں اور ہاتھوں کو بار بار دھوئیں، امن کیلئےجانوں کےنذرانےپیش کرنےوالےبہادرسپوتوں کوسلام۔

Comments

یہ بھی پڑھیں