عمرکوٹ: پاکستان تحریک انصاف کے وائس چیئرمین شاہ محمود قریشی نے کہا ہے کہ عام انتخابات میں کسی نے دھاندلی کرنے کی کوشش کی تو اسے نہیں چھوڑا جائے گا، ہر پولنگ اسٹیشن کے اندر اور باہر فوج کا جوان موجود ہوگا۔
ان خیالات کا اظہار انہوں نے عمر کوٹ میں جلسہ عام سے خطاب کرتے ہوئے کیا، شاہ محمود قریشی کا کہنا تھا کہ 2013 اور 2018 میں ایک بنیادی فرق میں دیکھ رہا ہوں، تبدیلی انشااللہ سندھ میں انقلاب برپا کرسکتی ہے۔
انہوں نے کہا کہ میرا ایمان ہے کہ اللہ کے بعد طاقت کا سرچشمہ عوام ہیں، عمر کوٹ کی تاریخ میں اتنا بڑا اجتماع پہلے کبھی نہیں ہوا، عمرکوٹ کا جلسہ اس تبدیلی کا پیش خیمہ ہےجس کی قوم منتظر ہے۔
شیر آیا اور اڈیالہ منتقل ہو گیا، ملک میں معمول کے مطابق میں کام جاری ہیں، شاہ محمود قریشی
رہنما پی ٹی آئی کا کہنا تھا کہ اجتماعی کاوشوں اور حمایت سے یقین ہے کہ ہم کامیاب ہوں گے، آج میں پہلی بار آپ کے دروازے پر دستک دینے نہیں آیا، آپ کو یاد ہوگا 2013 میںبھی میں نے عمرکوٹ کا رخ کیا تھا۔
شاہ محمود قریشی کا کہنا تھا کہ میں اپنے نہیں بلکہ آپ کے مستقبل کے لیے یہاں آیا ہوں، عام انتخابات میں واضح کامیابی حاصل کریں گے۔
ان کا مزید کہنا تھا کہ عمرکوٹ کو تبدیلی کی سخت ضرورت ہے، عوام کو یاد ہونا چاہیے کہ 2013 میں تھرپارکر میں نتیجہ تبدیل کرنے کے لیے بیلٹ پیپرز کو جلادیا گیا تھا۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔