site
stats
پاکستان

نوازشریف کو لیڈرشپ سے کوئی نہیں ہٹا سکتا، چوہدری نثار

روات: مسلم لیگ ن کے رہنماء چوہدری نثار علی خان نے کہا ہے کہ وفاقی کابینہ کا حصہ کیوں نہیں بنا جلد وضاحت پیش کروں گا، نوازشریف سے وزیراعظم کاعہدہ لیا گیا مگر اُن سے لیڈر شپ کوئی نہیں چھین سکتا۔

روات میں جلسہ عام سے خطاب کرتے ہوئے چوہدری نثار نے کہا کہ یہاں کے لوگ پاکستان سے محبت کرنے والے ہیں، یہ علاقہ شہیدوں، غازیوں اور وفاداروں کا ہے، اس علاقے کے لوگوں نے مجھے منتخب کیا جو میرے لیے بہت بڑے اعزاز کی بات ہے۔

انہوں نے کہا کہ آج کل سیاست میں عزت بہت کم رہ گئی ہے کیونکہ سیاستدان ایک دوسرے کے خلاف گالم گلوچ کررہے ہیں، ملکی سیاست میں سچ اور جھوٹ کی تمیز باکل ختم ہوگئی جس کی وجہ سے اب سیاست کرنا بہت مشکل کام ہوگیا۔

چوہدری نثار نے کہا کہ مخالفین 8 سال تک اقتدار میں رہے مگر انہوں نے ایک میگا واٹ بجلی نہیں بنائی جبکہ ن لیگ جب بھی اقتدار میں آئی ہمیشہ ترقیاتی کام ہوئے، آج حلقے میں 2 میگا منصوبوں کا افتتاح کرنے آیا ہوں جن میں تحصیل ہیڈ کوارٹر اسپتال اور سٹرک کی تعمیر شامل ہے۔

سابق وزیرداخلہ نے کہا کہ ملک کو بہت سے خطرات لاحق ہیں اور سیاست دان ایک دوسرے سے گالم گلوچ میں مصروف ہیں تاہم میرا یقین ہے کہ جب تک آپ جیسے لوگ موجود ہیں ملک میں ہمیشہ حق و صداقت کی صدائیں بلند ہوتی رہیں گی اور پاکستان پر کوئی آنچ نہیں آئے گی۔

چوہدری نثار نے کہا کہ میں نے حلقے میں منصوبوں کے افتتاح کی خبر صرف اخبار میں دی مگر جب یہاں آیا تو جم غفیر نے میرا استقبال کیا، آپ لوگوں کی محبت کو دیکھ کر میرا ایمان تازہ اور یقین مضبوط ہوگیا ہے، آپ نے جس نمائندے کو منتخب کیا اُس کے قدموں میں کبھی لرزش نہیں دیکھیں گے۔

لیگی رہنماء نے کہا کہ ملک بیرونی خطرات سے دوچار ہے اور ہم ایک دوسرے کے خلاف نئے محاذ کھول رہے ہیں، خوشامد کلچر نے ہمیشہ حکومتوں کو اندر سے ختم کیا، میں نے ہمیشہ سچ کی سیاست پر یقین رکھا اور لیڈر کے سامنے ہر صورت سچ بولا اس لیے آج بھی کہتا ہوں کہ نوازشریف کو وزیراعظم کے عہدے سے ہٹا دیا گیا مگر لیڈر شپ کا عہدہ اُن سے کوئی نہیں چھین سکتا۔

گو عمران گو کے نعروں کو سُن کر چوہدری نثار نے کہا کہ آپ لوگ نعرے نہ لگائیں کیونکہ ہمیں ملک اور پارٹی کو مشکل سے نکالنا ہے، آپ سب کو عہد کرنا ہوگا کہ ملک اور پارٹی کی خاطر کسی بھی قسم کی قربانی سے دریغ نہیں کریں گے اور ہر صورت پارٹی کو مشکل سے نکالیں گے۔

ویڈیو دیکھیں


اگرآپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اوراگرآپ کو یہ مضمون پسند آیا ہے تو اسے اپنی فیس بک وال پرشیئرکریں۔

Print Friendly, PDF & Email
20

Comments

comments

اس ویب سائیٹ پر موجود تمام تحریری مواد کے جملہ حقوق@2018 اے آروائی نیوز کے نام محفوظ ہیں

To Top