The news is by your side.

Advertisement

‘ وزیراعظم عمران خان کیخلاف پی ٹی وی پارلیمنٹ حملہ کیس کا کوئی ثبوت نہیں’

اسلام آباد : پی ٹی وی حملہ کیس میں وزیراعظم عمران خان کی بریت کی درخواست پر تحریری دلائل میں کہا گیا ہے کہ عمران خان کیخلاف اس کیس میں کوئی ثبوت نہیں، یہ کیس سیاسی مقدمہ تھا۔

تفصیلات کے مطابق پی ٹی وی حملہ کیس میں وزیراعظم عمران خان کی بریت کی درخواست پرتحریری دلائل جمع کرادیے گئے ، عبداللہ بابراعوان ایڈووکیٹ نے تحریری دلائل اے ٹی سی میں جمع کرائے۔

وکیل عمران خان نے کہا کہ کسی گواہ نے عمران خان کے مقدمے میں ملوث ہونےکا بیان نہیں دیا، عمران خان کیخلاف پی ٹی وی پارلیمنٹ حملہ کیس کا کوئی ثبوت نہیں، یہ کیس سیاسی مقدمہ تھا ،سزا کا کوئی امکان نہیں۔

وکیل کا مزید کہنا تھا کہ عمران خان کو جھوٹے اور بےبنیاد مقدمے میں پھنسایا گیا، ضابطہ فوجداری کی دفعہ265کےتحت عمران خان کو بری کیا جائے۔

انسداددہشت گردی عدالت نےعمران خان کی درخواست پرفیصلہ محفوظ کررکھا ہے، عمران خان کی بریت کی درخواست پرفیصلہ 29 اکتوبر کو سنایا جائے گا۔

خیال رہے 2014 میں پاکستان تحریک انصاف نے پاکستان عوامی تحریک کے ساتھ مل کر 126 دن کا دھرنا دیا تھا، دھرنے کے دوران پی ٹی وی کے دفتر اور پارلیمنٹ پر حملہ کیا گیا۔

بعد ازاں عمران خان سمیت پارٹی کے دیگر رہنماؤں پر 2014 کے دھرنے کے دوران 4 مقدمات درج کیے گئے تھے، جن میں پی ٹی وی کے دفتر، پارلیمنٹ اور ایس ایس پی تشدد سمیت لاؤڈ اسپیکر ایکٹ کی خلاف ورزی کا مقدمہ شامل تھا۔

Comments

یہ بھی پڑھیں