لاہور: وزیر خوراک پنجاب عبدالعلیم خان کا کہنا ہے کہ پنجاب کےکسی ضلع میں گندم کی نقل و حمل پر پابندی نہیں ہے۔
تفصیلات کے مطابق جنوبی پنجاب گندم ترسیل کی شکایات پر سینئر وزیر عبدالعلیم خان کی زیر صدارت ویڈیو لنک اجلاس ہوا جس میں محکمہ خوراک کے سینئر افسران کو 24گھنٹے میں جنوبی پنجاب پہنچنے کی ہدایت کی گئی۔
عبدالعلیم خان کا کہنا تھا کہ آئندہ ہفتےجنوبی پنجاب کے مختلف اضلاع کا دورہ کروں گا،پنجاب کےکسی ضلع میں گندم کی نقل و حمل پر پابندی نہیں ہے۔
وزیر خوراک پنجاب نے جنوبی پنجاب میں گندم خریداری پر توجہ مرکوز کرنے کی ہدایت کرتے ہوئے کہا کہ انتظامیہ روزانہ کی بنیاد پرگندم خریداری کی تفصیلات بھجوائے۔
انہوں نے سیڈ کمپنیوں سے متعلق امور کے حل کے لیے کمیٹی قائم کرنے کی ہدایت کرتے ہوئے کہا کہ رمضان میں گندم، آٹے کی قلت نہیں ہونی چاہیے،ہدف پورا کرنے کے بعدگندم صوبے سے باہر بھیجیں گے۔
گندم کی مصنوعی قلت پیدا کرنے کی کسی صورت اجازت نہیں دیں گے،عبدالعلیم خان
یاد رہے کہ گزشتہ روز سینئر وزیر خوراک پنجاب عبدالعلیم خان نے گندم کی ترسیل روکنے کی خبر کا نوٹس لیتے ہوئے سیکریٹری خوراک سے جنوبی پنجاب سےگندم باہر نہ آنے کی تفصیلات طلب کی تھیں۔
عبد العلیم خان کا مزید کہنا تھا کہ گندم کی مصنوعی قلت پیدا کرنے کی کسی صورت اجازت نہیں دیں گے۔
