رواں برس کے نوبل انعام برائے ادب کے لیے امریکی گلوکار باب ڈیلن کے نام کا اعلان کردیا گیا۔ وہ پہلے نغمہ نگار ہیں جنہیں ادب کے نوبل انعام سے نوازا گیا ہے۔
باب ڈیلن کو یہ انعام روایتی امریکی گلوکاری میں جدید شاعرانہ تاثرات کی آمیزش سے تخلیق کردہ موسیقی پر دیا جارہا ہے۔
BREAKING 2016 #NobelPrize in Literature to Bob Dylan “for having created new poetic expressions within the great American song tradition” pic.twitter.com/XYkeJKRfhv
— The Nobel Prize (@NobelPrize) October 13, 2016
انہیں اس سے قبل بھی نوبل انعام کے لیے نامزد کیا گیا لیکن وہ انعام حاصل کرنے میں ناکام رہے۔
سنہ 1941 میں پیدا ہونے والے باب ڈیلن کا اصل نام رابرٹ ایلن زمر مین ہے۔ انہوں نے بغیر کسی تربیت کے خود ہی ہارمونیکا (ماؤتھ آرگن)، گٹار اور پیانو بجانا سیکھا۔ باب نے اپنی گلوکاری کا آغاز امریکی ریاست منیسوٹا کے کافی ہاؤسز میں گا کر کیا۔
کولمبیا کے صدر کے لیے امن کا نوبل انعام *
ان کی بہترین تخلیقات 60 کی دہائی میں سامنے آئیں جس کے بعد وہ امریکی تاریخ بیان کرنے والے غیر رسمی تاریخ دان بن گئے۔
ان کے گانے ’بلوئنگ ان دا ونڈ‘ اور ’دا ٹائمز دے آر اے چینجنگ‘ عام افراد کے حقوق کے لیے چلائی جانے والی تحریکوں کے ترانے بن گئے۔
واضح رہے کہ گزشتہ ہفتے سے مختلف شعبہ جات میں نوبل انعام کے فاتحین کے ناموں کا اعلان جاری ہے۔
نوبل انعام دینے کی باقاعدہ تقریب 10 دسمبر کو سوئیڈن کے دارالحکومت اسٹاک ہوم میں منعقد کی جائے گی۔ البتہ امن کا نوبل انعام اسی روز ناروے کے دارالحکومت میں دیا جائے گا جہاں نارویجیئن نوبل کمیٹی یہ انعام رواں برس کے فاتح کولمبین صدر یو آن سانتوس کو دے گی۔
