The news is by your side.

Advertisement

این اے 120: تحریک انصاف کی یاسمین راشد کے کاغذات نامزدگی منظور

اسلام آباد: این اے 120 کے ضمنی انتخاب کے لیے پاکستان تحریک انصاف کی امیدوار ڈاکٹر یاسمین راشد کے کاغذات نامزدگی منظور ہوگئے۔ ان کا کہنا ہے کہ کلثوم نواز کے لیے حالات اچھے نہیں اس لیے لندن جارہی ہیں۔

تفصیلات کے مطابق سابق وزیر اعظم نواز شریف کی خالی ہونے والی سیٹ این اے 120 لاہور پر ہونے والے ضمنی انتخاب کے لیے پاکستان تحریک انصاف کی امیدوار ڈاکٹر یاسمین راشد کے کاغذات نامزدگی منظور ہوگئے۔

میڈیا سے گفتگو کرتے ہوئے ان کا کہنا تھا کہ ہم ووٹ خریدتے نہیں بلکہ مانگتے ہیں۔

ان کا کہنا تھا کہ کلثوم نواز کے کاغذات نامزدگی پر مجموعی طور پر 25 اعتراضات لگائے ہیں۔ کلثوم نواز نے اپنا اقامہ کاغذات نامزدگی میں لگایا تھا، وہ ایف زیڈ ای کی ڈپٹی چیئرمین تھیں جبکہ نواز شریف کی طرح کلثوم نواز نے بھی تنخواہ ظاہر نہیں کی اور انہوں نے کاغذات نامزدگی بھی مکمل نہیں کیے۔

یاسمین راشد کا کہنا تھا کہ ہم نے کلثوم نواز کے کاغذات نامزدگی مسترد کرنے کی استدعا کی ہے۔ انہیں بھی پتہ ہے حالات ان کے لیے اچھے نہیں ہیں اسی لیے وہ لندن جارہی ہیں۔ ’پہلے بھی پاکستان کے حالات لندن سے کنٹرول کرنے کی کوشش کی گئی‘۔

مزید پڑھیں: کلثوم نواز لندن روانہ

انہوں نے مزید کہا کہ ہم سمجھتے ہیں کہ ادارے مضبوط ہونے چاہئیں۔

یاد رہے کہ قومی اسمبلی کی لاہور این اے 120 کی نشست نواز شریف کے بطور وزیر اعظم نا اہل ہوجانے کے بعد خالی ہوئی تھی۔ مذکورہ نشست پر ضمنی انتخاب 17 ستمبر کو ہوں گے۔

این اے 120 کے لیے مسلم لیگ ن کی جانب سے نواز شریف کی اہلیہ کلثوم نواز جبکہ پاکستان تحریک انصاف کی جانب سے یاسمین راشد بطور امیدوار کھڑی ہورہی ہیں۔


Print Friendly, PDF & Email

Comments

comments

یہ بھی پڑھیں