The news is by your side.

Advertisement

شمالی کوریا کا جنوبی کوریا کے ساتھ امن مذاکرات جاری رکھنے سے انکار

پیانگ یانگ: شمالی کوریا نے جنوبی کوریا کے ساتھ امن مذاکرات جاری رکھنے سے انکار کردیا۔

غیرملکی خبررساں ادارے کے مطابق شمالی کوریا نے جنوبی کوریا کے صدر مون جے اُن پر تنقید کرتے ہوئے کہا ہے کہ ان کے اقدامات کی وجہ سے ہم جنوبی کوریا کے ساتھ مذاکرات جاری نہیں رکھ سکتے ہیں۔

شمالی کوریا نے جنوبی کوریا اور امریکا کے درمیان ہونے والی مشترکہ فوجی مشقوں کے خلاف احتجاج کرتے ہوئے انہیں جنگ کی ریہرسل قرار دیا۔

جنوبی کورین صدر نے جاپان سے آزادی حاصل کرنے سے متعلق تقریب میں کہا تھا کہ 2045 تک جزیرہ نما کوریا ایک ہوجائے گا۔

مزید پڑھیں: شمالی کوریا کا 2 بیلسٹک میزائلوں کا تجربہ

صدر مون جے اُن کا کہنا تھا کہ جزیرہ نما کوریا کو جوہری ہتھیاروں سے پاک کرنے کا مقصد حاصل کرنا سب سے مشکل مرحلہ تھا کیونکہ شمالی اور جنوبی کوریا کے درمیان مذاکرات ڈیڈ لاک کا شکار تھے۔

ان کا کہنا تھا کہ ایک ایسا کوریا ہمارا منتظر ہے جو مشرقی ایشیا اور دنیا میں خوشحالی اور امن لائے گا۔

واضح رہے کہ چند روز قبل شمالی کوریا نے 2 میزائلوں کا تجربہ کیا تھا، ان میزائلوں کے تجربے سے شمالی کوریا ے جوہری ہتھیاروں اور بیلسٹک میزائل پروگرام کے مستقبل کے حوالے سے شمالی کوریا اور امریکا کے درمیان ہونے والے مذاکرات پیچیدگی کا شکار ہوگئے ہیں۔

یاد رہے کہ جنگ عظیم دوئم کے خاتمے پر کوریا دو ٹکڑوں میں تقسیم ہوگیا تھا۔

Comments

comments

یہ بھی پڑھیں