پیانگ یانگ: شمالی کوریا کے لاکھوں شہری اپنے سب سے بڑے حریف ملک امریکا کو ’صفحہ ہستی سے مٹانے‘ کے لیے میدان میں آگئے۔
غیر ملکی میڈیا کی رپورٹس کے مطابق شمالی کوریا کے تقریباً 8 لاکھ شہریوں نے رضاکارانہ طور پر فوج میں شمولیت یا پھر دوبارہ خدمات انجام دینے کا اعلان کر دیا۔
یہ دعویٰ شمالی کوریا کے ایک مقامی اخبار کی رپورٹ میں کیا گیا ہے۔ 8 لاکھ شہریوں نے ایک حکومتی تقریب میں شرکت کے دوران اس بات کا عہد کیا کہ وہ فوج میں خدمات انجام دیں گے۔ شہریوں میں طلبہ کی بھی بڑی تعداد موجود تھی۔
شمالی کوریا حکومت کی جانب سے ایسی تقریب کا انعقاد طویل فاصلے تک مار کرنے والے خطرناک نیوکلیئر میزائل کے تجربے کے بعد کیا گیا۔
اخباری رپورٹ میں کہا گیا کہ وطن کے دفاع اور دشمن کو صفحہ ہستی سے مٹانے کے لیے شہری اٹھ کھڑے ہوگئے، انہوں نے کہا کہ امریکا اور اس کے ساتھی ہماری آزادی، جینے اور ترقی کرنے کے حق کو ختم کرنے کی کوشش کر رہے ہیں۔
خیال رہے کہ خطے میں شمالی کوریا کے بڑھتے ہوئے خطرات کا مقابلہ کرنے کے لیے جنوبی کوریا اور امریکی افواج نے پیر کے روز 11 روزہ مشترکہ مشقیں کیں جو 2017ء کے بعد پہلی بار دیکھی گئیں۔
