سیئول(14 مارچ 2026): شمالی کوریا نے ایک بار پھر طاقت کا مظاہرہ کرتے ہوئے اپنے مشرقی ساحل سے سمندر کی جانب میزائل فائر کر دیا ہے، جس کے بعد خطے میں کشیدگی کی نئی لہر دوڑ گئی ہے۔
جنوبی کوریائی حکام کے مطابق شمالی کوریا نے یہ میزائل اپنے مشرقی ساحل سے داغا، جبکہ جاپانی حکومت کا دعویٰ ہے کہ فائر کیا گیا طیارہ بیلسٹک میزائل ہو سکتا ہے۔ جاپانی کوسٹ گارڈ نے تصدیق کی ہے کہ شمالی کوریا کی جانب سے فائر کیا گیا میزائل سمندر میں گر گیا ہے۔
رپورٹس کے مطابق شمالی کوریا نے یہ میزائل تجربہ امریکا اور جنوبی کوریا کی جاری مشترکہ فوجی مشقوں کے دوران کیا ہے۔ پیانگ یانگ کی جانب سے اس اقدام کو سیئول اور واشنگٹن کی فوجی مشقوں کے جواب میں ایک بھرپور ردعمل قرار دیا جا رہا ہے۔
میزائل فائر کیے جانے کے بعد جاپانی حکام نے اپنی سمندری حدود میں الرٹ جاری کر دیا ہے اور صورتحال کی کڑی نگرانی کی جا رہی ہے۔ دونوں ممالک کے دفاعی حکام کسی بھی ہنگامی صورتحال سے نمٹنے کے لیے ہائی الرٹ ہیں۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں