پیانگ یانگ: شمالی کوریا نے مختصر فاصلے تک مار کرنے والے مزید 2 میزائلوں کا تجربہ کردیا۔
غیرملکی خبررساں ادارے کے مطابق شمالی کوریا نے مختصر فاصلے تک مار کرنے والے مزید 2 میزائلوں کا تجربہ کیا ہے، یہ میزائل تجربے ایسے وقت میں کیے گئے جب امریکی سفیر ایٹمی مذاکرات پر ڈیڈ لاک کے خاتمے کے لیے جنوبی کوریا میں موجود ہیں۔
جنوبی کوریا کے عسکری حکام کے مطابق شمالی کوریا نے ملک کے شمال مغربی سائنوری بیس سے میزائل فائر کیے جنہوں نے تقریباً 260 میل کا فاصلہ طے کیا۔
جوائنٹ چیف آف اسٹاف جنوبی کوریا کا کہنا ہے کہ 2 شارٹ رینج میزائل مشرقی حصے کی طرف فائر کیے گئے۔
دوسری جانب شمالی کوریا نے کم فاصلے تک مار کرنے والے بیلسٹک میزائل تجربات کو معمول کی کارروائی قرار دیتے ہوئے کہا کہ اس حوالے سے کسی کو پریشان نہیں ہونا چاہئے۔
مزید پڑھیں: شمالی کوریا کا ’ٹیکٹیکل گائیڈڈ میزائل‘ کا کامیاب تجربہ
شمالی کورین فوج کے بیان کے مطابق میزائل تجربات پر جنوبی کوریا کی تشویش غیر ضروری ہے جسے مسترد کرتے ہیں۔
شمالی کوریا کی وزارت خارجہ کا کہنا ہے کہ واشنگٹن کے ساتھ جوہری مذاکرات میں آنے والے تعطل پر تحمل کا مظاہرہ کررہے ہیں، بے بنیاد الزامات سے ایسی صورت حال پیدا ہوسکتی ہے جو کوئی بھی فریق کسی قیمت پر نہیں چاہتا۔
واضح رہے کہ امریکی صدر ڈونلڈ ٹرمپ اور شمالی کوریا کے رہنما کم جونگ ان کے درمیان ملاقاتیں ہوئی تھیں جس کے نتیجے میں شمالی کوریا نے میزائل تجربوں کو موخر کرتے ہوئے امریکی تحفظات دور کرنے کی یقین دہانی کرائی تھی۔
رواں برس فروری میں دونوں رہنماؤں کے درمیان ویتنام میں ملاقات ہوئی تھی تاہم شمالی کوریا کو جوہری اسلحے کے حوالے سے پابندیوں میں نرمی میں توسیع دینے کے معاملے پر اختلافات کے باعث مذاکرات ملتوی کردئیے گئے تھے۔
