واشنگٹن: ڈونللڈ ٹرمپ نے دعویٰ کیا ہے کہ شمالی کوریا میں قید تین امریکیوں کو رہائی مل گئی اور جلد وہ اپنے وطن واپس پہنچ جائیں گے۔
امریکی میڈیا کے مطابق شمالی کوریا اور امریکا کے سربراہان کے مابین گزشتہ دنوں ہونے والی ملاقاتوں کے ثمرات سامنے آرہے ہیں جس کے تحت کم جونگ انتظامیہ نے تین برس سے غداری کے الزام میں قید امریکیوں کو رہا کیا۔
امریکی صدر نے سماجی رابطے کی ویب سائٹ پر امریکیوں کی رہائی کے حوالے سے خبر سناتے ہوئے بتایا کہ ’وزیردفاع مائیک پومپیو شمالی کوریا میں پہلے سے طے شدہ مذاکرات کے لیے موجود ہیں اور تینوں امریکی ان ہی کے ساتھ وطن واپس پہنچیں گے‘۔
صدر ٹرمپ نے مزید کہا کہ ’تینوں شہریوں کی حراست کے دوران بھی صحت اچھی ہے تاہم رہائی کے بعد اُن کا خصوصی طبی معائنہ کرایا گیا جو قابل اطمینان ہے، کم جونگ کے ساتھ جلد ایک اور اہم بیٹھک ہوگی جس کے مقام کا فیصلہ کیا جارہا ہے‘۔
I am pleased to inform you that Secretary of State Mike Pompeo is in the air and on his way back from North Korea with the 3 wonderful gentlemen that everyone is looking so forward to meeting. They seem to be in good health. Also, good meeting with Kim Jong Un. Date & Place set.
— Donald J. Trump (@realDonaldTrump) May 9, 2018
خیال رہے کہ گزشتہ دنوں امریکی صدر ڈونلڈ ٹرمپ نے کہا تھا کہ شمالی کوریا کے رہنما کم جونگ ان سے ملاقات کے دوران معاہدہ ممکن ہے جس کے لیے وہ پرامید ہیں کہ ایک دن تمام کوریائی افراد جوہری ہتھیاروں سے پاک جزیرہ نما خطے میں مل کر رہیں گے۔
امریکی صدر ڈونلڈ ٹرمپ کا کہنا تھا کہ وہ شمالی کوریا اور جنوبی کوریا کے درمیان ہونے والے کامیاب مذاکرات کے باوجود شمالی کوریا پر دباؤ برقرار رکھیں گے۔
یاد رہے کہ گزشتہ ماہ شمالی کوریا اور جنوبی کوریا کے رہنماؤں نے تاریخی ملاقات کے بعد جزیرہ نما کوریا کو جوہری ہتھیاروں سے پاک کرنے کے لیے مل کرکام کرنے پراتفاق کیا تھا۔
واضح رہے کہ گزشتہ ماہ فلوریڈا میں امریکی صدر ڈونلڈ ٹرمپ نے کم جونگ سے ہونے والی متوقع ملاقات کو پہلے سےہی کامیاب قرار دیتے ہوئے کہا تھا کہ اگر ایسا نہیں ہوا تو میں بات ادھوری چھوڑ کر واپس آجاؤں گا۔
