نئی دہلی: بھارت میں کرونا وائرس کے لاک ڈاؤن کے دوران سڑکوں پر پراسرار نوٹ نظر آنا شروع ہوگئے، لوگ ان نوٹوں کو چھونے سے گریز کر رہے ہیں اور خوف و ہراس کا شکار ہیں۔

بھارتی ریاست کرناٹک کے شہر رائچور میں پراسرار طور پر سڑک پر 500 کے نوٹ نظر آنا شروع ہوگئے، لوگ ان نوٹوں کو چھونے سے گھبرا رہے ہیں۔

کئی افراد نے اس بارے میں پولیس کو اطلاع دی جس کے بعد پولیس مذکورہ مقام پر پہنچ گئی۔ پولیس نے نوٹوں کو اپنے قبضے میں لے کر لوگوں سے پوچھ گچھ شروع کردی ہے۔

مقامی افراد کا کہنا ہے کہ نوٹوں پر کرونا وائرس بھی ہوسکتا ہے اور کوئی جان بوجھ کر اسے پھیلانے کے لیے یہ عمل کر رہا ہے، علاقے کے لوگ خوف و ہراس میں مبتلا ہیں۔

پولیس کا کہنا ہے ان نوٹوں کو جانچ کے لیے لیباریٹری روانہ کیا گیا ہے۔ رائچور کے ضلع ایس پی ڈاکٹر وید مورتی نے اپیل کی ہے کہ یہ پراسرار نوٹ کہیں بھی دیکھے جائیں تو فوراً پولیس کو اطلاع دی جائے۔

پولیس نے عوام سے نوٹوں کو نہ چھونے کی اپیل بھی ہے اور کہا ہے کہ لوگ افواہیں پھیلانے سے گریز کریں۔