واشنگٹن: ریپبلکن پارٹی کے امریکی صدارتی امیدوارڈونلڈ ٹرمپ نے پاکستان کے نیوکلئیر ہتھیاروں کو بڑا مسئلہ قراردے دیا۔
امریکہ میں ریپبلکن پارٹی کے صدارتی امیدوارکی الیکشن مہم میں ان کی وجہ شہرت مسلم مخالف بیانات دینا ہے اوراب وہ واحد مسلم ملک کے ایٹمی اثاثوں پربھی انگلی اٹھانے لگے ہیں۔
ان کا کہناتھا کہ ’’پاکستان ایک اہم ملک ہے اوراب وہ ایک اہم مسئلہ بن گیا ہے کیونکہ اس کے پاس نیوکلئیر ہتھیارہیں‘‘۔
اتوار کے روزپاکستان کے شہر لاہورمیں ہونے والے بم دھماکے کے ردعمل میں ان کا کہنا تھا کہ’’ شدت پسند اسلام کے مسئلے کا کسی دوسرے امریکی امیدوارسے زیادہ بہتر اورتنہا سامنا کرسکتا ہوں‘‘۔
ڈونلڈ ٹرمپ امریکی صدارتی امیدواروں کی دوڑ میں متنازعہ ترین شخصیت ہیں، کبھی تو وہ امریکہ سے مسلمانوں کو بے دخل کرنے کی بات کرتے ہیں توکبھی شدت پسندی کو ختم کرنے کی صلاحیت رکھنے کا دعویٰ کرتے ہیں۔
پاکستان نے ایک عمدہ نیوکلیائی سیکیورٹی اسٹرکچر تیار کررکھا ہے
واضح رہے کہ ڈونلڈ ٹرمپ نے پاکستان کے نیوکلئیر ہتھیاروں کے حوالے سے یہ بیان اس وقت دیا ہے کہ جب عالمی ایٹمی توانائی ایجنسی نے نیوکلیائی سیکیورٹی ٹریننگ کا سالانہ اجلاس پہلی بار اپنے ہیڈ کوارٹرکے بجائے پاکستان میں کرنے کو ترجیح دی۔
اجلاس کے اعلامیے میں کہا گیا تھا کہ پاکستان نے ایک عمدہ نیوکلیائی سیکیورٹی اسٹرکچر تیار کررکھا ہے اور پاکستان میں نیوکلیائی سیکیورٹی ٹریننگ فراہم کرنے کی قابل ذکراستعداد موجود ہے۔
اس پس منظر میں امریکی صدارتی امیدوارکا بیان محض ایک سیاسی بیان سے زیادہ کی اہمیت نہیں رکھتا۔