تازہ ترین

حکومت کا ججز کے خط پر انکوائری کمیشن بنانے کا اعلان

اسلام آباد: وفاقی حکومت نے اسلام آباد ہائی کورٹ...

فوجی عدالتوں سے 15 سے 20 ملزمان کے رہا ہونے کا امکان

اسلام آباد : اٹارنی جنرل نے فوجی عدالتوں سے...

شمالی کورین رہنما کی طاقتور بہن نے ایٹمی حملے کی دھمکی دے دی

پیانگیانگ: شمالی کورین رہنما کی طاقتور بہن نے جنوبی کوریا کو ایٹمی ہتھار استعمال کرنے کی دھمکی دے دی ہے۔

تفصیلات کے مطابق شمالی کوریا کے رہنما کِم جونگ اُن کی طاقت ور بہن کِم یو جونگ نے جنوبی کوریا کو دھمکی دی ہے کہ اگر انھیں اشتعال دلایا گیا تو وہ جوہری جوابی کارروائی کر دیں گے۔

جنوبی کوریا کے وزیر دفاع نے جمعے کے روز کہا تھا کہ ان کے ملک کی فوج کے پاس نمایاں طور پر بہتر رینج، اور طاقت والے میزائل موجود ہیں، جو شمالی کوریا میں کسی بھی ہدف کو درست اور تیزی سے نشانہ بنانے کی صلاحیت رکھتے ہیں۔

کِم یو جونگ، جو حکمراں جماعت کی سینیئر عہدے دار اور کم جونگ ان کی بہن ہیں، نے کہا کہ جنوبی کوریا کے وزیر دفاع کا شمالی کوریا پر حملوں کے بارے میں حالیہ ریمارکس دینا ایک ‘بہت بڑی غلطی’ ہے۔

خیال رہے کہ شمالی کوریا کی جانب سے اس سال تیزی سے طاقت ور میزائلوں کے تجربات کیے گئے ہیں، جس کے بعد دونوں کوریائی ممالک کی جانب سے فوجی طاقت کا مظاہرہ بڑھا دیا گیا ہے۔

سیئول اور واشنگٹن میں حکام کو یہ بھی خدشہ ہے کہ شمالی کوریا 2017 کے بعد پہلی بار جوہری ہتھیاروں کا تجربہ دوبارہ شروع کرنے کی تیاری کر رہا ہے۔

کم یو جونگ نے کہا کہ اگر جنوبی کوریا کی فوج شمالی کوریا کی سرزمین کی خلاف ورزی کرتی ہے تو اسے ایک ‘ناقابل تصور خوفناک تباہی’ کا سامنا کرنا پڑے گا، جنوبی کوریا جوہری ہتھیاروں سے لیس ریاست پر کسی بھی حملے کے بعد بچ نہیں سکے گا۔

یہ تین دنوں میں جنوبی کورین رہنما کے تبصروں پر کم یو جونگ کا دوسرا غصے سے بھرا جواب ہے، اتوار کے روز انھوں نے ریمارکس کو ‘لاپروا’ قرار دیا، اور کہا کہ جنوب اگر تباہی کو روکنا چاہتا ہے تو خود کو قابو کرے۔

Comments

- Advertisement -