پنجاب کی وزارت اعلیٰ کے امیدوار اور ق لیگ کے مرکزی رہنما چوہدری پرویزالہٰی نے کہا ہے کہ ہمارے ممبران کی تعداد اللہ تعالیٰ کے فضل سے پوری ہے۔
اے آر وائی نیوز کے مطابق گورنر پنجاب عمر سرفراز چیمہ نے ق لیگ کے سربراہ چوہدری شجاعت حسین سے ملاقات کی، ان کی عیادت کی اور انہیں گلدستہ پیش کیا، اس موقع پر پنجاب میں وزارت اعلیٰ کے امیدوار چوہدری پرویز الہٰی بھی موجود تھے۔
ذرائع نے بتایا کہ ملاقات کے دوران ان کے مابین موجودہ سیاسی صورتحال اور نئے وزیراعلیٰ پنجاب کے انتخاب کے معاملے پر تبادلہ خیال کیا گیا، اس موقع پر چوہدری شجاعت حسین نے کہا کہ انشااللہ فتح ہماری ہوگی۔
ذرائع کے مطابق اس موقع پر وزیراعلیٰ پنجاب کے امیدوار چوہدری پرویز الہٰی نے کہا کہ ہمارے ممبران کی تعداد اللہ تعالیٰ کے فضل سے پوری ہے، ناراض اراکین سمیت سب سے رابطے میں ہیں اور جلد سب متحد ہوجائیں گے۔
