کراچی: سندھ کے سرکاری اسپتالوں میں ملازمت کرنے والے نرسنگ اسٹاف نے مطالبات کی منظوری کے لیے کل سندھ اسمبلی کے گھیراؤ کا اعلان کردیا۔
تفصیلات کے مطابق سرکاری اسپتالوں کے نرسنگ اسٹاف نے مطالبات منوانے کے لیے کل سندھ اسمبلی کے گھیراؤ کا اعلان کردیا، کل سندھ بھر سے قافلے کراچی پریس کلب پہنچیں گے۔
نرسنگ اسٹاف کا کہنا ہے کہ سندھ اسمبلی کے سامنے بھرپور احتجاج اور دھرنا ہوگا، سندھ کے سرکاری اسپتالوں میں تمام امور کا بائیکاٹ کیا جائے گا۔
نرسنگ اسٹاف کی جانب سے مطالبہ کیا گیا ہے کہ سروس اسٹرکچر اور 4 درجاتی فارمولے کا نوٹیفکیشن جاری کیا جائے۔
مزید پڑھیں: کراچی: 9 روز سے جاری نرسوں کا احتجاج رنگ لے آیا
یاد رہے کہ سرکاری اسپتالوں کے نرسنگ اسٹاف نے مطالبات کے حق میں کراچی پریس کلب کے باہر 9 روز سے دھرنا دیا ہوا تھا جس کی وجہ سے مریضوں کو شدید مشکلات کا سامنا تھا۔
نرسنگ اسٹاف کااحتجاج اُس وقت رنگ لایا تھا جب کامیاب مذاکرات کے بعد محکمہ صحت سندھ کے حکام نے مطالبات کے حوالے سے کمیٹی تشکیل دینے کا اعلان کیا تھا۔
حکام کا کہنا تھا کہ 7رکنی کمیٹی نرسنگ اسٹاف کی ترقی سےمتعلق محکمہ خزانہ سے مشاورت کرے گی اور ایک ہفتے کے اندر تجاویز متعلقہ سربراہان کو ارسال کردی جائیں گی تاکہ جائز مطالبات کو پورا کردیا جائے، تاہم نرسنگ اسٹاف کی جانب سے کل سندھ اسمبلی کے گھیراؤ کا اعلان کیا گیا ہے۔
