ریاض: سعودی عرب کے اسکولوں میں نرسز کی تعیناتی کا عمل شروع کردیا گیا، ابتدائی طور پر مشرقی ریجن کے اسکولوں میں نرسز تعینات کی جارہی ہیں۔
سعودی ویب سائٹ کے مطابق سعودی عرب میں مشرقی ریجن کے تمام اسکولوں میں نرسوں کی تعیناتی کا پروگرام جاری کیا گیا ہے، پروگرام کے پہلے مرحلے میں ریجن کے 28 اسکولوں میں میل و فی میل نرسز متعین کی جائیں گی۔
حکام کا کہنا ہے کہ مشرقی ریجن کے اسکولوں میں اس وقت تقریباً 4 لاکھ طلبہ ہیں، اس اعتبار سے ہر ایک ہزار طالبہ پر ایک نرس کو متعین کیا جائے گا۔
میڈیا رپورٹ کے مطابق نرسوں کی تعیناتی کے پروگرام سے قبل تمام اسکولوں میں ہیلتھ کیئر کے حوالے سے ایک اسامی موجود تھی جبکہ نرسوں کی تعیناتی نہیں ہوتی تھی۔
ابتدائی طور پر مشرقی ریجن میں تجرباتی بنیادوں پر اسکولوں میں طبی خدمات انجام دینے کے لیے ہیلتھ کلینک میں نرس کو متعین کیا جائے گا تاکہ کسی بھی ہنگامی صورت حال میں فوری طبی امداد مہیا کی جا سکے۔
مشرقی ریجن میں تجرباتی طور پر نرسوں کی تعیناتی کاپ روگرام کامیاب ہونے کے بعد اسے دیگر علاقوں میں بھی نافذ کیا جائے گا۔
