لاہور : حکومت پنجاب نے فیصل آباد اور گجرانوالہ میں فحش ڈانس دکھانے والے تھیٹرز بند کرادیے، آرٹس کونسل کے سربراہان کو بھی ان کے عہدوں سے برطرف کردیا گیا۔
تفصیلات کے مطابق گجرانوالہ اور فیصل آباد میں تھیٹرز میں ہونے والی فحاشی اور وہاں تماش بینوں کو دکھائے جانے والے فحش ڈانس کی شکایات پر وزیر اطلاعات و ثقافت عامر میر نے بڑا ایکشن لے لیا۔
صوبائی وزیر اطلاعات نے آرٹس کونسل فیصل آباد اور گوجرانوالہ کے سربراہان کو عہدوں سے برطرف کردیا اور فحش ڈانس دکھانے والے تھیٹرز بھی بند کردیے گئے۔
وزیر اطلاعات و ثقافت عامر میر نے کہا کہ آرٹس کونسل کے دونوں سربراہان فن کے نام پر فحاشی پھیلانے والے مافیا کو تحفظ دے رہے تھے، برطرف کیے گئے سربراہان کی جگہ نئے افسران تعینات کر دیے گئے ہیں۔
پنجاب بھر کی آرٹس کونسلز کے سربراہان کو اسٹیج ڈراموں کی سخت مانیٹرنگ کی ہدایات جاری کی گئیں ہیں۔
انہوں نے متعلقہ شعبوں سے وابستہ افراد کو متنبہ کرتے ہوئے کہا کہ کہیں سے بھی اس قسم کی شکایت ملی تو سخت کارروائی عمل میں لائی جائے گی۔
