جدہ: اسلامی تعاون کی تنظیم (او آئی سی) نے جنگی جنون میں مبتلا بھارت کی دراندازی کی شدید مذمت کی ہے۔
تفصیلات کے مطابق بھارت کی جانب سے لائن آف کنٹرول کی خلاف ورزی کرتے ہوئے پاکستانی حدود میں داخل ہونے پر او آئی سی نے سخت الفاظ میں مذمت کی ہے۔
اسلامی تعاون کی تنظیم نے بھارتی جارحیت کی مذمت کرتے ہوئے کہا کہ بھارت خطے میں امن کو خطرے والے اقدامات سے گریز کرے۔
او آئی سی کا کہنا تھا کہ بانی رکن کے خلاف بھارتی جارحیت کی مذمت کرتے ہیں۔
دوسری جانب بھارتی دراندازی پر یورپی یونین کا بھی رد عمل سامنے آگیا، یو این نے دونوں ممالک کو باہمی مشاورت سے معاملات حل کرنے پر زور دیا ہے۔
یورپی یونین کا کہنا ہے کہ اس صورت حال پر گہری نظر رکھے ہوئے ہیں اور دونوں ممالک کی قیادت سے رابطے میں ہیں، پاک بھارت سے اپیل ہے مزید تناؤ سے بچنے کیلئے کارروائیاں روکیں۔
بھارتی جارحیت: شاہ محمود کا امریکی اسٹیٹ سیکریٹری اور سیکریٹری جنرل او آئی سی کو فون
خیال رہے کہ پڑوسی شر پسند ملک بھارت کی جانب سے ہونے والی جارحیت پر وزیرِ خارجہ شاہ محمود قریشی نے امریکی اسٹیٹ سیکریٹری مائیک پومپیو اور سیکریٹری جنرل او آئی سی سے ٹیلی فونک رابطہ کیا ہے۔
شاہ محمود قریشی نے امریکی سیکریٹری اسٹیٹ مائیک پومپیو سے ٹیلی فونک رابطہ کر کے انھیں بھارت کی طرف سے ایل او سی کی خلاف ورزی سے آگاہ کیا۔
