کراچی : ملیر پولیس نے ایک ڈرائیور کو آئل ٹینکر سمیت حراست میں لیا ہے، ٹینکر میں لاکھوں روپے مالیت کا پائپ لائن سے چوری کیا جانے والا خام تیل موجود تھا، پانچ ملزمان فرار ہوگئے۔
تفصیلات کے مطابق ملیر کے علاقے شاہ لطیف میں پولیس نے کامیاب کارروائی کرتے ہوئے پٹرولیم کمپنی کی پائپ لائن سے آئل چوری کرنے والے گروہ کا ملزم حراست میں لے لیا۔
ایس ایس پی ملیر عرفان بہادر نے میڈیا کو بتایا کہ چوری کا کروڈ آئل لے جانے والے ٹینکر کو ڈرائیور سمیت پکڑا اور ٹینکر کے ڈرائیور سے پوچھ گچھ کی۔
ایس ایس پی ملیر کے مطابق ڈرائیور نے بتایا کہ ان کا گروہ پٹرولیم کمپنی کی لائن سے خام تیل چوری کرتے ہیں، ملزم کی نشاندہی پر کھدائی گئی گئی تو پائپ میں لگے غیرقانونی کنکشن پکڑے گئے۔
پولیس کا کہنا ہے کہ ملزمان کے دیگر پانچ ساتھی داؤد، دلاور، یاسر، نورلاشاری اور ظہیر موقع سے فرار ہونے میں کامیاب ہوگئے۔
ایس ایس پی ملیر عرفان بہادر کے مطابق پکڑے گئے آئل ٹینکر میں 5ہزار لیٹر آئل موجود ہے جس کی مالیت 26لاکھ روپے سے زائد ہے۔
واردات کا مقدمہ پٹرولیم کمپنی کے ایک مجاز افسر کی مدعیت میں شاہ لطیف تھانے میں درج کرلیا گیا ہے، آئل ٹینکر، برآمد کئے گئے پائپ اور دیگر سامان پولیس نے قبضے میں لے لیا۔
