اوکاڑہ : ٹیلیفون پر محبت کے جال میں پھنسا کر لڑکی نے نوجوان کو اغواء کرادیا، مغوی نوجوان 15لاکھ روپے تاوان دے کر دوماہ بعد گھر واپس پہنچ گیا۔
تفصیلات کے مطابق پنجاب میں نوجوان لڑکوں کو لڑکیوں کے ذریعے ورغلا کر تاوان کیلئے اغوا کرنے والے گروہ نے اوکاڑہ کے مغوی نوجوان کے اہل خانہ سے 15 لاکھ روپے وصول کرکے چھوڑ دیا۔
اوکاڑہ کے محلہ احمد آباد سے دو ماہ قبل اغوا ہونے والا نوجوان 15لاکھ روپے تاوان کے عوض رہا کردیا گیا، متاثرہ نوجوان نے میڈیا کو بتایا کہ لڑکی نے ٹیلیفون کے ذریعے محبت کا جھانسہ دے کر بلا کر اغوا کرایا۔
نوجوان کے اہل خانہ نے بتایا کہ 2ماہ تک قید میں رہنے کے بعد15لاکھ روپے تاوان کے بدلے چھوڑا گیا ہے، اغوا کاروں کی جانب سے بازیابی کیلئے50لاکھ روپے تاوان طلب کیا گیا تھا۔
متاثرہ نوجوان نے دعویٰ کیا کہ ملزمان کے پاس میرے علاوہ 50سے زائد لوگ حبس بےجا میں تھے، اہل خانہ نے بتایا کہ واقعے کیخلاف مقامی پولیس نے مقدمہ بھی درج نہیں کیا تھا، مغوی نوجوان نے چیف جسٹس پاکستان سے اپیل کی ہے کہ واقعے کا نوٹس لیں۔
