اگر آپ نیا اسمارٹ فون خریدنا چاہتے ہیں تو پرانے فون کو بے کار سمجھنے کے بجائے آپ اس سے اپنے گھر کو خودکار بناسکتے ہیں
دنیا بھر میں ہر روز اسمارٹ فون کے نئے ماڈل جدید فیچرز کے ساتھ مارکیٹ میں متعارف ہوتے رہتے ہیں جس سے پرانے اسمارٹ فونز اپنی اہمیت آہستہ آہستہ کھونے لگتے ہیں اور اکثر لوگ موبائل فون کا نیا ماڈل آتے ہی پرانے فون کو ترک کرکے نیا اسمارٹ فون لے لیتے ہیں، پرانے فون اگرچہ مارکیٹ میں فروخت بھی ہوجاتے ہیں مگر ہم آپ کو بتارہے ہیں اس کا انتہائی مفید استعمال۔
تو پھر اگر آپ نیا اسمارٹ فون خریدنا چاہتے ہیں تو پرانے کو فروخت کریں اور نہ ہی الماری میں بند کیونکہ اب ایک چھوٹے سے آلے کے ذریعے ہر فون سے نیا کام لیا جاسکتا ہے۔
آپ اپنے اسمارٹ فون کو ہوم آٹومیشن کے لیے استعمال کرسکتے ہیں۔
کراؤڈفنڈنگ ویب سائٹ پر ایدرائنو جیسے چھوٹے آلے نے دھوم مچائی ہوئی ہے، اس میں کیمرے کے ساتھ لیزر سینسر اور اسمارٹ فون سے جڑنے والا پورا نظام موجود ہے جب کہ بلیوٹوتھ اور وائی سمیت آر ایف آئی ڈی کے تمام پروٹوکولز بھی دستیاب ہیں جس کا مطلب ہے کہ یہ زگ بی جیسے آئی او ٹی نیٹ ورک سے بھی جڑ سکتا ہے۔
آپ کو اپنے گھر کو خودکار بنانے کے لیے غیراستعمال شدہ اسمارٹ فونز کی ضرورت ہوگی جن میں سے ایک کو آپ گھر کا کیمرا بناسکتے ہیں، دوسرے کو حرکت محسوس کرنے والے سینسر میں تبدیل کرسکتے ہیں جس کو آواز، تالی بجانے اور ایپ سے چلایا جاسکتا ہے۔
اس ایپ کے ذریعے گھر کے تمام سینسرز کی اطلاعات آپ کو ملتی رہیں گی، ایدرائنو کو سی ای ایس 2020 کی نمائش میں بہترین ایجاد کے اعزاز سے نوازا گیا ہے۔
اسٹینڈ کی طرح نظر آتا یہ آلہ نہ صرف اسمارٹ فون کو سہارا دے کر سیدھا رکھتا ہے بلکہ اسے بجلی بھی فراہم کرتا ہے۔
رواں سال مئی میں فروخت میں فروخت کے لیے پیش کیے جانے والے اس آلے کی تعارفی قیمت 80 ڈالر رکھی گئی ہے۔
