اسلام آباد : عمانی حکومت نے پاکستان سول ایوی ایشن اتھارٹی کیلئے نئی ٹریول ایڈوائزری جاری کردی، جس میں پاکستانیوں کا داخلہ عمانی سفارتخانے کے خصوصی پرمٹ سے مشروط کردیا۔
تفصیلات کے مطابق عمان میں کورونا سے بچاو کیلئے حفاظتی انتظامات مزید سخت کردیئے اور پاکستان سول ایوی ایشن اتھارٹی کو بھی عمان حکومت کی نئی ٹریول ایڈوائزری جاری کردی گئی ہے۔
ٹریول ایڈوائزری کے مطابق عمانی ائیر لائنز سلام ائیر اور عمان ائیر کے علاوہ دیگر ائیر لائنز کو عمان میں آپریٹ کرنے کی اجازت نہیں، پاکستان سمیت دیگر ممالک سے عمان جانے والے مسافر صرف عمانی ائیر لائنز سے ہی عمان سفر کریں گے۔
ٹریول ایڈوائزری میں کہا گیا ہے کہ عمان نے پاکستانیوں کو داخلے بھی عمانی سفارت خانے کے جاری کردہ خصوصی پرمٹ سے مشروط کردیا ہے۔
ایڈوائزری کے مطابق عمان میں مسافروں کاقیام کے دوران سیلف انشورنس کا ہونا لازم ہوگا، عمان جانے والے پاکستانیوں کو بھی چودہ روز کیلئے قرنطینہ ہونا لازم ہوگا، صرف جہازوں کا عملہ قرنطینہ کی شرط سے مستثنیٰ ہوگا۔
ٹریول ایڈوائزری میں مسافروں کو عمان پہنچ کر قرنطینہ کی شرط پوری کرنے کیلئے ٹریکنگ بریسلیٹ پہننا بھی لازم قرار دیا گیا ہے۔
