The news is by your side.

Advertisement

آئی ایم ایف کی جانب سے قرض پروگرام کی پہلی قسط آج جاری ہوگی

ایشیائی ترقیاتی بینک نے بھی پانچ سال کے دوران پاکستان کو دس ارب ڈالر قرضہ دینے کا اعلان کردیا، جو رعایتی نوعیت کا ہوگا۔

اسلام آباد : عالمی مالیاتی ادارے آئی ایم ایف سے پاکستان کیلئے چھ ارب ڈالر قرض پروگرام کی پہلی قسط آج جاری کی جائے گی۔ قسط کا حجم ایک ارب ڈالر ہوگا۔

تفصیلات کے مطابق پروگرام کے تحت پاکستان کو سالانہ دو ارب ڈالر ملیں گے، تفصیلات کے مطابق پاکستان اور آئی ایم ایف کے درمیان معاہدے کے مطابق چھ ارب ڈالر قرض پروگرام کی پہلی قسط آج ملے گی۔

وزارت خزانہ ذرائع کے مطابق آئی ایم ایف سے لئے گئے چھ ارب ڈالرکے قرض پروگرام میں سے ایک ارب ڈالر کی پہلی قسط آج جاری کی جائے گی۔ رقم کل تک اسٹیٹ بینک پاکستان کے اکاؤنٹ میں ریسیو ہوجائے گی۔

پاکستان کو قرض پروگرام کے تحت سالانہ دو ارب ڈالر ملیں گے۔ رقم سے پاکستانی زرمبادلہ ذخائر پر دباؤ میں کمی آئے گی۔ پاکستان کو آئی ایم ایف سے یہ قرضہ ایکسٹینڈیڈ فنڈ فیسیلیٹی کے تحت ملا ہے۔

قرض پروگرام انتالیس ماہ پر مشتمل ہوگا۔ آئی ایم ایف کاقرض پروگرام پاکستان میں معاشی اصلاحات اور ادائیگیوں کا توازن بہتر کرنے کیلئےمددگار ثابت ہوگا۔

عالمی مالیاتی ادارے سے معاہدےکے بعد پاکستان پردیگر مالیاتی اداروں سے قرض کے حصول کی راہ ہموارہوگئی ہے۔ پہلےبھی پاکستان نے دوست ممالک سے ساڑھے سات ارب ڈالرحاصل کئے ہیں,مؤخرادائیگیوں پر سعودی عرب اور آئی ڈی بی کی سہولت اس کے علاوہ ہے۔

علاوہ ازیں ایشیائی ترقیاتی بینک نے اعلان کیا ہے کہ پانچ سال کے دوران پاکستان کو دس ارب ڈالر قرضہ فراہم کیا جائے گا اور یہ رقم پاکستان کے لیے رعایتی قرضہ ہوگی۔

ایشیائی ترقیاتی بینک کے اعلامیے کے مطابق قرضے کی مد میں رقم مختلف ترقیاتی منصوبوں کے لیے دی جائے گی، ان منصوبوں میں زراعت، ٹرانسپورٹ، تعلیم و تجارت، توانائی سیکیورٹی، سیاحت، آبی وسائل اور سڑک کے ذریعے وسط ایشیائی ریاستوں سے روابط بہتر بنانا شامل ہے۔

Comments

یہ بھی پڑھیں