کرپٹو کرنسی جس تیزی سے دنیا کی معیشت میں اپنی جگہ بنا رہی ہے، جلد ہی لیمبر گینی اور بگاٹی جیسی دنیا کی مہنگی ترین گاڑیاں بھی صرف ایک سکے میں خریدی جا سکیں گی۔
دراصل بٹ کوائن کی بڑھتی قیمت کے پیش نظر لیمبر گینی اور بگاٹی کے بارے میں یہ خیال پیش کیا جا رہا ہے کہ انھیں مستقبل میں بٹ کوائن کے بیرومیٹر کے طور پر لیا جا سکے گا۔
ڈالر کی قیمت میں گراوٹ کے خطرے کے پیش نظر کریکن ایکسچینج کے سی ای او جیسی پاؤل کا کہنا ہے کہ لیمبرگینی اور بگاٹی بٹ کوائن کے مستقبل کی قیمت کا ایک بہتر بیرومیٹر ثابت ہو سکتے ہیں۔
جیسی پاؤل کا کہنا ہے کہ بٹ کوائن کی قیمت جس طرح بڑھتی جا رہی ہے، اسے دیکھتے ہوئے رواں سال کے اختتام پر لیمبرگینی کی قیمت ایک بٹ کوائن، اور 2023 کے آخر تک بگاٹی کی قیمت بھی ایک بٹ کوائن ہو جائے گی۔
یعنی اب دنیا کی مہنگی ترین لیمبرگینی اور بگاٹی کاریں صرف ایک سکے کی قیمت میں حاصل کی جا سکیں گی۔
کریکن ایکسچینج کے سی ای او کا کہنا ہے کہ ڈالر کے ساتھ بٹ کوائن کو ناپنا مناسب نہیں ہے، کیوں کہ بٹ کوائن کی بڑھتی ہوئی قیمت ڈالر کو بہت پیچھے چھوڑ چکی ہے۔
واضح رہے کہ گزشتہ سال کے اختتام تک بٹ کوائن کی قیمت اتنی بڑھی کہ اس سے نئی ہونڈا سوکس خریدی جا سکتی تھی، جب کہ گزشتہ ماہ ایک بٹ کوائن کی قیمت 60 ہزار ڈالر تک پہنچ گئی تھی۔
ادھر ٹیسلا کمپنی کے سربراہ ایلون مسک نے خوش خبری دی ہے کہ رواں ماہ امریکا میں کمپنی کی گاڑیاں کرپٹو کرنسی سے خریدنا ممکن ہو جائے گا، اور رواں سال کے اختتام پر دیگر ممالک کے لوگ بھی بٹ کوائن کے ذریعے ٹیسلا کی کاریں خرید سکیں گے۔
