کراچی: پاکستان پیپلز پارٹی کے چیئرمین بلاول بھٹو زرداری نے کہا ہے کہ صرف پیپلز پارٹی کراچی کی تقدیر بدل سکتی ہے، اپنی سیاست کا آغاز اسی شہر سے کر رہا ہوں۔
ان خیالات کا اظہار انہوں نے کراچی کے مختلف علاقوں میں کارکنان سے خطاب کرتے ہوئے کیا، بلاول بھٹو زرداری کا کہنا تھا کہ پاکستان پیپلز پارٹی کو کراچی میں روکنے کی کوشش کی گئی، کراچی کے وارث بننے والے نہ خود کام کرتے ہیں نہ کسی کو کرنے دیتے ہیں۔
انہوں نے کہا کہ پیپلز پارٹی کے دور میں جو کام ہوئے کسی نے نہیں کیے، ہم نے اسٹیل ملز کو بچانا ہے، اسٹیل ملز کی زمین سندھ حکومت کی ملکیت ہے، ہم کسی کو اسٹیل ملز نہیں بیچنے دیں گے۔
ن لیگ اور پی ٹی آئی نے دہشت گردوں سے مل کر ہم پر حملے کیے، بلاول بھٹو
سربراہ پی پی کا کہنا تھا کہ ہم اصولوں کی اور دیگر جماعتیں نفرت کی سیاست کررہی ہیں، جو کام رہتا ہے وہ میں پورا کروں گا، پی پی کا مقابلہ دہشت گردی، غربت اور بے روزگاری سے ہے، ہماری جدوجہد محترمہ کا نامکمل مشن پورا کرنے کے لیے ہے۔
بلاول بھٹو کا مخالفین پر تنقید کرتے ہوئے کہنا تھا کہ کے پی میں 5 سال میں کوئی بھی اسپتال یا یونیورسٹی نہیں بنائی گئی، نیا پاکستان کا نعرہ لگانے والوں نے اپنے صوبے میں کچھ نہیں کیا۔
ان کا مزید کہنا تھا کہ ہم پورے سندھ میں آر او پلانٹس لگائیں گے، کراچی کے شہریوں کے لیے صاف پانی لائیں گے، سمندر کے پانی کو میٹھا کرنا پڑا تو کریں گے۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
