ماسکو : روسی صدر ولادیمیر پیوٹن نے ماسکو کی سب سے بڑی جامع مسجد کا افتتاح کردیا، اس موقع پر صدر پیوٹن نے کہا کہ اسلامی ممالک کےسربراہ شدت پسندی کےخلاف اٹھ کھڑےہوں۔
افتتاحی تقریب میں صدر مملکت ولادی میرپیوٹن، ترک صدررجب طیب اردگان، فلسطین کے سربراہ محمودعباس سمیت اہم شخصیات نے شرکت کی۔
اس مسجد کا رقبہ بیس ہزار مربع میٹر ہے اور اس میں بیک وقت دس ہزار افراد کے نماز ادا کرنے کی گنجائش ہے، مسجد کی تعمیر پر سترہ کروڑ ڈالرز لاگت آئی ہے اور اس کی تکمیل میں ایک عشرہ لگ گیا ہے، مسجد میں ایک بڑا کانفرنس ہال، سات تیز رفتار لفٹ، ہوا کو صاف بنانے والا جدید ترین نظام اور اے سی سسٹم ہے۔
صدرروس ولادی میرپیوٹن نے افتتاحی تقریب سے خطاب کرتے ہوئے کہا کہ داعش اسلام کو بدنام کررہے ہیں، سیاسی مقاصد کے حصول کے لیے نفرت پھیلائی جارہی ہے۔
صدر پیوٹن نے اسلامی سربراہوں پر زور دیا کہ شدت پسندی کے خلاف اٹھ کھڑے ہوں،ترک صدر طیب اردگان نے بھی تارکین وطن کے بحران اورشدت پسندی کےخلاف اقدامات پر زور دیا۔
فلسطینی صدر محمود عباس نے کہا کہ اسلامی مقامات کی حرمت یقینی بنائی جائے ۔
