The news is by your side.

Advertisement

مجھے کیوں نکالا کہنے والوں سے سوال بنتا ہے کہ اس بچی کو کیوں مارا،خورشیدشاہ

قصور: اپوزیشن لیڈر خورشید شاہ کا کہنا ہے کہ سانحہ قصور جیسے واقعات دیگر ممالک  میں بھی ہوتے ہیں لیکن وہاں کی حکومتیں فوری ایکشن لیتی ہیں، دیگرحکومتیں پنجاب حکومت کی طرح بے بس نہیں ہوتیں۔

تفصیلات کے مطابق اپوزیشن لیڈر سید خورشید شاہ آج قصور پہنچے جہاں انہیں نے زینب کے اہل خانہ سے ملاقات کرکے تعزیت کی اور اس کے بعد پریس کانفرنس سے خطاب کرتے ہوئے انہوں نے کہا کہ پنجاب میں پہلے بھی ایسے واقعات ہوچکے ہیں اگر اس حوالے سے توجہ دی جاتی تو شاید آج زینب زندہ ہوتی۔

سانحہ قصور واقعے کے خلاف احتجاج کرنے والوں کی گرفتاری کے متعلق ان کا کہنا تھا کہ کاغذوں کے پیٹ بھرنے کے لیے بے گناہوں کو جیلوں میں ڈالا گیا، بے گناہوں کو پکڑنا حکومت کی بے بسی اور نااہلی ہے، یہ سمجھ رہے تھے کہ ماڈل ٹاؤن کی طرح یہ بھی معاملہ ختم ہوجائے گا۔

 مسلم لیگ ن پرتنقید کرتے ہوئے ان کا کہنا تھا کہ یہ ملک کسی مقصد کے لیے حاصل کیا گیا تھا اس لیے نہیں کہ چند گھرانے ملک میں حکومت کریں۔ خورشید شاہ کا کہنا تھا کہ مجھے کیوں نکالا کہنے والوں سے سوال بنتا ہے کہ اس بچی کو کیوں مارا۔

ان کا مزید کہنا تھا کہ ہمارے حوالے سے کہا جاتا ہے کہ ہم یہاں سیاست کرنے آتے ہیں۔ سیاست اچھی چیزہے‘ سیاست سے ہی عوام کی خدمت کی جاتی ہے، پنجاب پولیس اور پنجاب حکومت مکمل طور پرناکام ہوچکے ہیں، قصور واقعے نے عوام کی آنکھیں کھول دی ہیں۔

زیادتی کے بعد قتل کی جانے والی بچی زینب کے والدین سے دکھ کا اظہار کرتے ہوئے ان کا کہنا تھا کہ میں زینب کے والدین کے ساتھ ہوں‘ ملزمان کوہر صورت قرار واقعی سزا ملنی چاہیے۔

واضح رہے کہ قصور واقعے نے سب کے دل دہلا دیئے ہیں، کمسن زینب کو پانچ روز پہلے اغوا کیا گیا تھا، جس کے بعد سفاک درندوں نے بچی کو زیادتی نشانہ بنا کر قتل کردیا تھا، جس کے خلاف ملک بھر میں لوگ سراپا احتجاج ہیں۔


اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

Comments

comments

یہ بھی پڑھیں