کراچی: سندھ ہائی کورٹ نے رہنما پاکستان پیپلز پارٹی نثار کھوڑو کو بیرون ملک جانے کی اجازت دے دی ہے۔
تفصیلات کے مطابق سندھ ہائی کورٹ نے آمدن سے زائد اثاثے اور منی لانڈرنگ کے الزامات کے کیس میں پاکستان پیپلز پارٹی (پی پی پی) کے رہنما نثار کھوڑو کی بیرون ملک جانے سے متعلق درخواست پر سماعت ہوئی۔
دوران سماعت عدالت نے نثار کھوڑو کا نام ایگزٹ کنٹرول لسٹ سے نکالنے کا حکم دیتے ہوئے انہیں نو اپریل سے انیس مئی تک بیرون ملک جانے کی اجازت دے دی۔
نیب کی جانب سے پی پی رہنما کو بیرون ملک جانے کی اجازت دینے کی مخالفت کی گئی، نیب پراسیکیوٹر نے عدالت کو آگاہ کیا کہ نثار کھوڑو کےخلاف نیب انکوائریاں کررہا ہے، نثارکھوڑو کو باہر جانےکی اجاز ت نہ دی جائے، خدشہ ہے کہ ملزم باہر جانےکے بعد وطن واپس نہیں آئےگا۔
یہ بھی پڑھیں: محکمہ خوراک سندھ میں کرپشن، پیپلزپارٹی رہنما نثار کھوڑو نیب میں پیش
اس موقع پر وکیل نثار کھوڑو نے عدالت کو بتایا کہ نثارکھوڑو کی فیملی ملک سے باہر مقیم ہے، کرونا اور لاک ڈاؤن کے باعث نثار کھوڑو فیملی سے نہیں ملے، تاہم عدالت نے نیب کی استدعا مسترد کی اور پی پی رہنما نثار کھوڑو کو بیرون ملک جانے کی اجازت دےدی۔
واضح رہے کہ سندھ ہائی کورٹ آمدن سے زائد اثاثے اور منی لانڈرنگ کے الزامات میں پہلے ہی پاکستان پیپلز پارٹی (پی پی پی) کے رہنما نثار کھوڑو کی عبوری ضمانت میں توسیع کرچکی ہے۔
