پیرس : فرانس کے دارالحکومت پیرس میں ہوائی اڈے پرفوجی اہلکار سے بندوق چھیننے کی کوشش کرنے والا مشتبہ شخص سیکورٹی فورسز کی فائرنگ میں ماراگیا۔
تفصیلات کےمطابق فرانسیسی حکام کا کہناہےکہ زاید بن بلغاسم نامی شخص نےپیرس میں اورلی ہوائی اڈے پرایک خاتون فوجی کے سر پر بندوق تعنی اور اس کا کہنا تھا کہ وہ ’اللہ کے لیے جان دینا چاہتا‘ ہے۔
پیرس کے ہوائی اڈے پرگولیوں کی آواز سننے کے بعد جہازوں میں سوار مسافروں کو اترنے سے روک دیا گیا۔اس کارروائی کے دوران تقریباً 3000 مسافر اور متعدد پروازیں متاثر ہوئیں۔
فرانسیسی سیکورٹی حکام کےمطابق زاید بن بلغاسم کو ماضی میں شدت پسندی کے حوالے سے رپورٹ کیا جا چکا ہے اور وہ سیکورٹی اداروں کی واچ لسٹ پر بھی تھا۔
پیرس میں پراسکوٹر فرینسز مولنز کا کہنا ہے کہ زاید بن بلغاسم ماضی میں ڈکیتیوں اور منشیات فروشی کے جرائم میں بھی ملوث رہا ہے۔
یاد رہےکہ اورلی ہوائی اڈے پریہ حملہ ایک ایسے وقت میں ہوا ہے جب فرانس میں آئندہ ماہ صدارتی انتخابات ہونے والے ہیں اور ملک ایمرجنسی کی صورت حال میں ہے۔
مزید پڑھیں: پیرس حملوں کے ماسٹر مائنڈ اور مزید2خودکش حملہ آوروں کو شناخت کرلیا گیا
واضح رہےکہ اورلی ہوائی اڈے پر تعینات فوجی آپریشن سنٹینل کا حصہ تھے جنھیں جنوری 2015 میں چارلی ہیبڈو حملوں اور نومبر 2015 میں پیرس حملوں کے بعد پولیس کی مدد کے لیے تعینات کیا گیا تھا۔یہ ہوائی اڈہ پیرس کا دوسرا بڑا ہوائی اڈہ ہے۔
