آسٹریلیا کے لیجنڈ کپتان مارک وا نے پاکستانی اسپنرز کے ساتھ ساتھ فاسٹ بولرز کو بھی آسٹریلوی ٹیم کے لیے خطرناک قرار دے دیا۔
آسٹریلیا 24 سال بعد تین ٹیسٹ، تین ون ڈے اور ایک ٹی ٹوئنٹی کے لیے پاکستان کا دورہ کرنے کرنے والی ہے جس کے لیے اسکواڈ کا اعلان کیا جاچکا ہے۔ دورے کا پہلا ٹیسٹ 4 مارچ سے راولپنڈی میں شروع ہوگا۔
56 سالہ وا نے پاکستان میں ٹیسٹ کرکٹ میں سنچری اسکور کر رکھی ہے، 1998 میں مارک ٹیلر کے ہمراہ ان کی 117 کی اننگز نے کراچی میں تیسرا ٹیسٹ ڈرا کرنے میں مدد فراہم کی تھی۔
ایک انٹرویو میں وا کا کہنا ہے کہ میں نے ہمیشہ سوچا کہ پاکستان کی وکٹیں ہندوستانی وکٹوں کی طرح نہیں ہیں وہ ٹوٹتی نہیں ہیں، اور اس پر اتنی دھول نہیں ہوتی، ان پر زیادہ گھاس بھی نہیں لیکن وہ کافی سخت ہیں، اور ساتھ ہی ریورس سوئنگ ہوتی ہے اس لیے اسپنرز کے ساتھ ساتھ فاسٹ بولرز بھی خطرناک ہیں۔
ان کا کہنا تھا کہ میرے دور میں پاکستان کے پاس مشتاق احمد اور ثقلین مشتاق جیسے اسپنرز تھے لیکن میں نے ہمیشہ سوچا کہ تیز گیند باز بھی اتنے ہی خطرناک ہوتے ہیں۔
مارک وا نے کہا کہ کافی عرصے سے مشاہدے میں آیا کہ ڈیوڈ وارنر فاسٹ بولرز کے خلاف زیادہ اچھا نہیں کھیل پائے ایسے میں شاہین آفریدی ان کے لیے ٹیسٹ کیس ہوگا۔
