ممبئی: بھارت کی متنازع ترین فلم پدماوت میں مرکزی کردار ادا کرنے والے بالی ووڈ اداکار رنویر سنگھ اور شاہد کپور کے زخمی چہروں کی تصاویر منظر عام پر آگئیں۔
تفصیلات کے مطابق ہدایت کار سنجے لیلا بھنسالی کی فلم ’پدماوت‘ کئی تنازعات کے بعد بالآخر 25 جنوری کو نمائش کے لیے پیش ہوئی تو مداحوں کی بڑی تعداد اسے دیکھنے کے لیے بڑی تعداد میں سینیما گھر پہنچے۔
پدماوت نے ریلیز ہونے کے بعد چار روز میں 112 کروڑ روپے کا ریکارڈ بزنس کیا اور باکس آفس پر چند دنوں میں ہی کامیابی کے جھنڈے لہرائے، فلم نے پہلے روز 19 کروڑ، دوسرے روز 32، تیسرے روز 27 کروڑ روپے کمائے۔
مزید پڑھیں: پدماوت: تمام رکاوٹیں عبور کرکے فلم 100 کروڑ کلب میں شامل
فلم میں دپیکا نے رانی پدمنی ، رنویر سنگھ نے بادشاہ علاؤ الدین خلجی اور شاہد کپور نے راجہ ماہ راول رتن سنگھ کا کردار بخوبی ادا کیا، شوٹنگ کے دوران مرکزی کردار ادا کرنے والے دونوں اداکار ذہنی مریض بھی بن گئے تھے۔
رنویر سنگھ اور شاہد کپور کی چند تصاویر سوشل میڈیا پر وائرل ہوئیں جن میں اُن کے زخمی چہرے دیکھے جاسکتے ہیں۔
تصاویر سوشل میڈیا پر شیئر ہوئیں تو دونوں اداکاروں کے مداح سمجھے کہ خدا نخواستہ انہیں پدماوت کی وجہ سے تشدد کا نشانہ بنایا گیا مگر تھوڑی دیر بعد یہ بات سامنے آگئی کہ ’یہ تصاویر دراصل سیٹ کی ہیں اور دونوں اداکار شوٹ ریکارڈ کروانے سے قبل تیار ہورہے ہیں‘۔
