یو اے ای میں دو روز قبل طوفانی بارش نے 75 سالہ ریکارڈ توڑا تو اس کے بعد دبئی کے آسمان نے سبز لبادہ اوڑھ کر سب کو حیران و پریشان کر دیا۔
دو روز قبل متحدہ عرب امارات میں ہونے والی بارش نے وہاں انسانی زندگی کو مفلوج کر دیا۔ بارش نے 75 سالہ ریکارڈ توڑا ابھی لوگ طوفانی بارش سے سنبھلے بھی نہ تھے کی اچانک دبئی کا آسمان نیلے سے سبز رنگ کا ہوگیا اور مقامی لوگ یہ منظر دیکھ کر حیران وپریشان ہوگئے۔
دبئی کا سیاہ بادلوں سے ڈھکا منظر یکدم سبز ہونے کی ویڈیو سوشل میڈیا پر وائرل ہو گئی جس پر لوگ مختلف تبصرے کر رہے ہیں۔
17 سیکنڈ کی اس ویڈیو میں دیکھا جا سکتا ہے کہ دبئی میں گہرے سرمئی اور سیاہ بادلوں سے گھرے آسمان کا رنگ اچانک سبز رنگ میں تبدیل ہو جاتا ہے اور دیکھتے ہی دیکھتے پورا شہر گرد آلود دھول سے بھر جاتا ہے۔
میڈیا رپورٹس میں دبئی کے آسمان پر رنگ تبدیل ہونے کو فضا میں روشنی کے پھیلاؤ کو بادل میں بوندوں کو روشن کرنے سے منسوب کیا گیا ہے، ساتھ ہی سوشل میڈیا پر پھیلی طوفان کی افواہوں کی تردید کرتے ہوئے کہا ہے کہ آسمان کے سبز رنگ ہونے کا طوفان سے کوئی تعلق نہیں ہے۔
آسمان کے بدلتے رنگ کو دیکھتے ہوئے یونیورسٹی آف وسکونسن میڈیسن کی ایک رپورٹ میں کوآپریٹو انسٹی ٹیوٹ فار میٹرولوجیکل سیٹلائٹ اسٹڈیز کے ایک تحقیقی ماہر موسمیات اسکاٹ بچمیئر کا حوالہ دیتے ہوئے کہا ہے کہ جب نیلی چیزیں سرخ روشنی سے روشن ہوتی ہیں، تو وہ سبز دکھائی دیتی ہیں۔ سبز رنگ اہم ہے، لیکن اس بات کا ثبوت نہیں ہے کہ طوفان آنے والا ہے۔ ایک سبز بادل صرف تب پیدا ہوتا ہے جب بادل بہت گہرا ہو، جو عام طور پر صرف گرجتے چمکتے بادلوں میں ہوتا ہے۔