تحریک انصاف کے دورِ حکومت میں تعینات کیے گئے ڈی جی سول ایوی ایشن سے متعلق حکومت نے بڑا فیصلہ کر لیا۔

ذرائع کے مطابق حکومت نے ڈی جی سول ایوی ایشن اتھارٹی خاقان مرتضیٰ کو تبدیل کرنے کا فیصلہ کیا ہے۔ خاقان مرتضیٰ کو پی ٹی آئی دور نومبر 2020 میں ڈی جی سی اےاےتعینات کیا گیا تھا۔

سیکریٹری ایوی ایشن سیف انجم کو ڈی جی سی اےاے کا اضافی چارج دینےکا فیصلہ کیا گیا ہے۔ خاقان مرتضیٰ کو چیئرمین ای اوبی آئی تعینات کیا جائے گا۔

رواں سال فروری میں سول ایوی ایشن آفیسرزایسوسی ایشن نے پاکستانی ائیرلائنز کی یورپی ممالک میں 4 سال سے پابندی کے معاملے پر ڈی جی سی اے اے کوہٹانے کا مطالبہ کیا۔

سول ایوی ایشن آفیسرز ایسوسی ایشن نے سیکریٹری ایوی ایشن کو مراسلہ لکھا ، جس میں کہا گزشتہ 4 سال سے پاکستانی ایرلائنز بحالی میں ڈی جی سی اے اے ناکام رہے، ڈی جی سی اے اے کو فوری ہٹاکر پروفیشنل اور قابل افسر کو لگایاجائے۔

سی اے اے آفیسرزایسوسی ایشن کا کہنا تھا کہ پاکستانی ائیرلائنز کی یورپی ممالک میں بحالی میں ناکامی سے اربوں روپے کا نقصان ہورہا ہے۔

چیئرمین پیپلزپارٹی بلاول بھٹو زرداری نے اپوزیشن ارکان کو بندر قرار دیدیا۔

پارلیمنٹ کے مشترکہ اجلاس میں صدر مملکت آصف علی زرداری کے خطاب کے دوران اپوزیشن ارکان کی جانب سے شورشرابے پر بلاول بھٹو نے کہا کہ اپوزیشن کا ایک ہی مقصد ہے کسی طرح بھی اپنے سیاستدانوں کےلیے این آراو حاصل کریں۔

انہوں نے کہا کہ پلاننگ کے تحت اپنے رہنما سے سعودی عرب پر جھوٹے الزام کا بیان دلوایا گیا جب ردعمل آیا تو تردید کر دی، دوغلےپن کی سیاست نہیں چلے گی۔

چیئرمین پیپلزپارٹی نے کہا مولانا فضل الرحمان کو گمراہ کیا جا رہا ہے کہ دھاندلی کے باعث ہارے وہ احتجاج کرنا چاہیں تو ہم رکاوٹ نہیں ڈالیں گے۔

قبل ازیں صدارتی خطاب کے دوران غیرمہذب رویہ اپنانے پر اسپیکر قومی اسمبلی نے جمشیددستی اور اقبال احمدخان کی رکنیت موجودہ سیشن تک معطل کردی۔

اسپیکر نے کہا صدارتی خطاب کے دوران جو ہوا وہ نہیں ہونا چاہیے تھا جمشید دستی، محمداقبال خان نے گندی زبان استعمال کی۔

پی ٹی آئی رہنما شیرافضل مروت نےکہا حکومتی بینچز کی طرف سے خواتین کے خلاف نامناسب زبان استعمال کی گئی اسپیکر نے یقین دہانی کرائی ہے رولنگ پر نظرثانی کریں گے۔

نئی تحقیقاتی رپورٹ میں کہا گیا ہے کہ پارلیمنٹ ہاؤس اور پارلیمنٹ لاجز میں فراہم کردہ پانی صاف اور حفظان صحت کے اصولوں کے مطابق ہے۔

ڈپٹی اسپیکر قومی اسمبلی سیدمیر غلام مصطفیٰ شاہ کی خصوصی ہدایت پر پارلیمنٹ ہاؤس اور پارلیمنٹ لاجز میں فراہم کردہ پینے کے پانی کے نمونے مستند لیبارٹری سے ٹیسٹ کروائے گئے۔ نئی رپورٹ میں پارلیمنٹ ہاؤس اور لاجز میں فراہم کردہ پانی کو صاف اور حفظان صحت کے اصولوں کے مطابق قرار دے دیا گیا۔

یاد رہے کہ ڈپٹی اسپیکر قومی اسمبلی سید میر غلام مصطفیٰ شاہ کی جانب سے پارلیمنٹ ہاؤس اور پارلیمنٹ لاجز میں مضر صحت/آلودہ پانی کی فراہمی کے حوالے سے پاکستان کونسل برائے آبی وسائل و تحقیق (PCRWR) کی رپورٹ کا نوٹس لیا گیا تھا۔پاکستان کونسل برائے آبی وسائل و تحقیق کی رپورٹ کے مطابق پارلیمنٹ ہاؤس اور لاجز میں فراہم کردہ پانی میں مضر صحت اجزاء پائے جانے کا انکشاف ہوا تھا۔

ڈپٹی اسپیکر قومی اسمبلی سید غلام مصطفیٰ شاہ کے نوٹس پر پارلیمنٹ ہاؤس اور پارلیمنٹ لاجز سے پانی کے نمونے لے کر مستند لیباٹری سے ٹیسٹ کرائے گئے۔ تحقیقاتی رپورٹ کے مطابق پارلیمنٹ ہاؤس اور پارلیمنٹ لاجز میں فراہم کردہ پانی صاف اور حفظان صحت کے اصولوں کے معیار کے مطابق ہے۔رپورٹ کے مطابق پانی میں کسی قسم کے بھی مضر صحت اجزاء نہیں پائے گئے۔

ڈپٹی اسپیکر قومی اسمبلی سید میر غلام مصطفیٰ شاہ نے کہا کہ پارلیمنٹ ہاؤس اور پارلیمنٹ لاجز میں اراکین پارلیمنٹ اور عملے کے ممبران کو فراہم کردہ پینے کا پانی آلودگی سے پاک اور محفوظ ہے۔انہوں نے کہا کہ صحت کے معاملے میں کسی بھی قسم کی کوتاہی کو ہرگز برداشت نہیں کیا جائے گا۔ انہوں نے کہا کہ اراکینِ پارلیمنٹ اور اسٹاف کی صحت پر سمجھوتہ نہیں ہوگا۔ انہوں نے کہا کہ آلودہ پانی کے استعمال سے انسانی صحت پر انتہائی مضر اثرات مرتب ہوتے ہیں۔

ڈپٹی اسپیکر قومی اسمبلی نے کیپیٹل ڈویلپمنٹ اتھارٹی (سی ڈی اے) کو مستقبل میں اس سلسلے میں تمام احتیاطی اقدامات کو یقینی بنانے کی ہدایت کرتے ہوئے کہا کہ پارلیمنٹ لاجز اور پارلیمنٹ ہاؤس میں پانی کے ٹینکوں کی بروقت صفائی کے لیے مناسب اور معیاری آپریٹنگ طریقہ کار (ایس او پیز) مرتب کیے جائیں۔

انہوں نے کہا کہ ہر تین ماہ بعد پانی کے نمونے PCRWR کو ٹیسٹ کے لیے بھجوائے جائیں۔ ڈپٹی سپیکر نے پانی کے نمونوں کی ٹیسٹنگ کے معاملے میں اضافی اخراجات سے بچنے کیلئے اقدامات کرنے پر زور دیتے ہوئے کہا کہ تھرڈ پارٹی سورس کے بجائے PCRWR سے پانی کے نمونوں کی جانچ کروائی جائے۔

سندھ حکومت نے پرائمری اسکولز کو اپ گریڈ کر کے ایلیمنٹری اسکول کا درجہ دینےکا فیصلہ کر لیا۔

یہ فیصلہ وزیر تعلیم سندھ سردار شاہ کی زیر صدارت اسکول ایجوکیشن سے متعلق ہونے والے اجلاس میں کیا گیا جس میں سندھ ایجوکیشن فاؤنڈیشن کی کارکردگی کا جائزہ بھی لیا گیا۔

اجلاس میں طے کیا گیا کہ پرائمری اسکولز کو اپ گریڈ کر کے ایلیمنٹری اسکول کا درجہ دیا جائے گا اور اس حوالے سے حکمت عملی ترتیب دی جائے گی۔

وزیرتعلیم نے کہا کہ ڈراپ آؤٹ  کم کرنے کیلئے پرائمری اسکول مرحلہ وار اپ گریڈ کیےجائیں گے اسکول ڈراپ آؤٹ کا تناسب کم کرنے کیلئے بلاول بھٹو نےخصوصی ٹاسک دیا ہے۔

سردارشاہ نے کہا کہ آئندہ تعلیمی سال سائنس کی تعلیم کی اہمیت کے سال کے عنوان سے منایا جائے گا۔ انہوں نے بتایا کہ سندھ ایجوکیشن فاؤنڈیشن کے 2566 اسکولز میں 8 لاکھ 74 ہزار طلبا زیرتعلیم ہیں۔