پاکستان کے لیے بڑا اعزاز، وزیر خارجہ بلاول بھٹو کی زیرصدارت نیویارک میں دنیا کے نوجوان وزرائے خارجہ کی کانفرنس ہوئی۔

اے آر وائی نیوز کے مطابق اس کانفرنس میں کینیڈا، چیک ری پبلک، ہنگری، قطر، سربیا اور دیگر ممالک کے نوجوان وزرائے خارجہ نے شرکت کی اور عالمی برادری کو درپیش مسائل کے حل پر بات چیت کی گئی۔

کانفرنس سے خطاب کرتے ہوئے بلاول بھٹو نے کہا کہ ہمیں امن اور ترقی کے حوالے سے چیلنجز سے نمٹنا ہوگا، مستقبل کی نسلوں کیلئے مساوی معاشی حقوق کی بھی جدوجہد کرنا ہوگی۔

انہوں نے کانفرنس میں شریک وزرائے خارجہ کو مخاطب کرتے ہوئے کہا کہ آپ سب دنیا کے نوجوان وزرائے خارجہ ہیں، آپ عالمی برادری کے درمیان بہتر تعاون میں اہم کردار ادا کرسکتے ہیں، اس ملاقات کا مقصد مستقبل کے لیے لائحہ عمل تشکیل دینا ہے۔

اس موقع پر کانفرنس کے شرکا نے دنیا کے مختلف نوجوان وزرائے خارجہ کو اکٹھا کرنے کے اقدام کو سراہا اور بلاول بھٹو کا ساتھ دینے کے عزم کا اظہار کیا۔

دوسری جانب وزیرخارجہ بلاول بھٹو زرداری نے امریکا کی انٹرنیشنل ڈیولپمنٹ فنانس کارپوریشن کے سی ای او سکاٹ ناتھن سے ملاقات کی جس میں نجی شعبے میں سرمایہ کاری کے مواقعوں پر بات چیت کی گئی۔

بلاول بھٹو زرداری اور امریکا کی انٹرنیشنل ڈولپمنٹ فنانس کارپوریشن کے سی ای او کے درمیان توانائی، زراعت کے علاوہ موسمیاتی تبدیلیوں سے مقابلے کے منصوبوں پر بھی تبادلہ خیال کیا گیا اور انہوں نے اسکاٹ ناتھن کو پاکستان کے دورے کی دعوت بھی دی۔

وزیر خارجہ کا کہنا تھا کہ معیشت اور خواتین کی خود مختاری پاکستان کی اولین ترجیح ہے۔

نیویارک میں وزیراعظم شہباز شریف کی زیر صدارت سیلاب سے متعلق اجلاس ہوا جس میں متعلقہ حکام نے پاکستان سے آن لائن شرکت کی۔

اے آر وائی نیوز کے مطابق وزیراعظم شہباز شریف کو اجلاس میں متعلقہ افسران نے سیلاب زدہ علاقوں میں امدادی کارروائیوں اور مواصلاتی نظام کی بحالی سے متعلق بریفنگ دی گئی، وزیر ریلوے خواجہ سعد رفیق نے وزیراعظم کو ریلوے ٹریکس کی بحالی سے متعلق آگاہ کیا، وزیر منصوبہ بندی احسن اقبال نے بتایا کہ سیلاب متاثرہ علاقوں میں 2 ملین فوڈ پیکس فوری بھیجے جا رہے ہیں اور کراچی سمیت مختلف علاقوں سے پیناڈول، پیرا سیٹامول کی بڑی مقداربرآمد ہوئی ہے۔

انہوں نے یہ بھی بتایا کہ سیلاب متاثرہ علاقوں میں سولر کے ذریعے کیمپوں میں بجلی فراہم کریں گے۔

اس موقع پر وزیراعظم نے متعلقہ حکام کو امدادی سرگرمیوں کے حوالے سے مزید ہدایات جاری کرتے ہوئے کہا کہ متاثرہ علاقوں میں غذائی اشیا، ادویات اور دیگر ضروری اشیا کی قلت نہیں ہونی چاہیے، سیلاب زدہ علاقوں میں امدادی اشیا کی ترسیل میں تیزی لائی جائے، بی آئی ایس پی کے تحت تمام مستحقین کو امداد کی فراہمی 10 روز میں یقینی بنائی جائے۔

شہباز شریف نے کہا کہ ادویات کی ذخیرہ اندوزی کرنے والوں کے ساتھ سختی سےنمٹا جائے گا۔

اس موقع پر وزیراعظم نے اجلاس کے شرکا کو بتایا کہ چینی صدر کے ساتھ ملاقات میں ایم ایل ون منصوبے پر بات چیت ہوئی ہے اور چین کے حوالے سے خصوصی ٹاسک فورس تشکیل دے دی ہے۔

یہ بھی پڑھیں: وزیراعظم شہباز شریف امریکا پہنچ گئے

واضح رہے کہ وزیراعظم شہباز شریف اقوام متحدہ کی جنرل اسمبلی اجلاس میں شرکت کے لیے نیویارک میں موجود ہیں اور وہ 23 ستمبر کو اجلاس سے خطاب کریں گے۔

کراچی: وزیر اطلاعات سندھ شرجیل انعام میمن نے صوبے میں آٹے کی نئی قیمتوں کا اعلان کر دیا ہے۔

اے آر وائی نیوز کے مطابق وزیر اطلاعات شرجیل میمن نے کہا کہ سندھ حکومت نے 10 کلو گرام آٹے کے تھیلے کی ایکس مل پرائس 640 روپے مقرر کی گئی ہے جبکہ فی کلو گرام آٹے کی ایکس مل پرائس 64 روپے مقرر کی گئی ہے۔

مزید پڑھیں: بارشوں سے سرکاری گوداموں میں لاکھوں ٹن گندم خراب

صوبائی وزیر نے کہا کہ 10 کلو گرام آٹے کے تھیلے کی ریٹیل پرائس 650 روپے مقرر کی گئی ہے اور فی کلو گرام آٹے کی ریٹیل پرائس 65 روپے مقرر کی گئی ہے۔

واضح رہے کہ ملک میں آٹے کا بحران شدت اختیار کرتا جا رہا ہے جبکہ نیشنل فلڈ ریسپانس سینٹر کا کہنا ہے کہ ملک میں گندم کے وافر ذخائر موجود ہیں اور قلت کا کوئی خدشہ نہیں، 7 ملین ٹن گندم موجود ہے اور ایک ملین ٹن مزید آ رہی ہے۔

ان کا کہنا تھا کہ لوگوں تک گندم اور آٹا پہنچانے میں مسائل نہیں ہوں گے، ذخیرہ اندوزی کرنے اور قیمت بڑھانے والوں کے خلاف حکومت کارروائی کرے گی، ملک میں بیجوں کی قلت ہے جو جلد پوری ہو جائے گی۔

ن لیگی رہنما اور وفاقی وزیر جاوید لطیف کے خلاف لاہور میں دہشتگردی ایکٹ کے تحت مقدمہ درج کرانے والا مدعی قاری ارشاد الرحمٰن سامنے آگیا ہے۔

اے آر وائی نیوز کے مطابق لاہور میں گزشتہ دنوں ن لیگی رہنما اور وفاقی وزیر جاوید لطیف کے خلاف دہشتگردی ایکٹ کے تحت مقدمہ درج کرانے والے قاری ارشاد الرحمٰن منظر عام پر آگئے ہیں اور انہوں نے متنبہ کیا ہے کہ اگر ملزمان گرفتار نہ ہوئے تو ساتھیوں سمیت احتجاجی دھرنا دوں گا۔

قاری ارشاد الرحمٰن نے میڈیا سے گفتگو کرتے ہوئے کہا ہے کہ عمران خان نے دنیا میں اسلامو فوبیا کے خلاف آواز بلند کی اور لیگی رہنماؤں کی حرکت سے لوگوں کے جذبات مجروح ہوئے ہیں۔

مقدمے کے مدعی قاری ارشاد کے وکیل ایڈووکیٹ علی احمد ڈوگر نے کہا کہ سرکاری ادارے عوام کے ٹیکسوں سے چلتے ہیں اور سرکاری وسائل کسی کے خلاف استعمال نہیں کیے جاسکتے۔

واضح رہے کہ جاوید لطیف کے خلاف گزشتہ پیر کو مقدمہ امام مسجد ارشاد الرحمٰن کی مدعیت میں تھانہ گرین ٹاؤن میں درج کیا گیا تھا جس میں پی ٹی آئی چیئرمین عمران خان کے خلاف غلط بیانی کرکے اشتعال دلانے کا الزام عائد کیا گیا ہے۔

یہ بھی پڑھیں: وفاقی وزیر جاوید لطیف پر دہشتگردی ایکٹ کے تحت مقدمہ درج

ایف آئی آر کے مطابق وفاقی وزیر جاوید لطیف نے وزیر اطلاعات اور نشریات مریم اورنگزیب ودیگر سے مشورہ کرکے منصوبے کے تحت پریس کانفرنس کی اور پاکستان ٹیلی ویژن کے اعلیٰ حکام نے انہیں اس سلسلے میں مکمل معاونت فراہم کی۔