ایئر عربیہ ابوظبی نے اپنے کاروبار کو وسعت دیتے ہوئے کویت کے لئے براہ راست روٹ شروع کرنے کا اعلان کردیا ہے۔

تفصیلات کے مطابق ایئر عربیہ ابوظبی نے ابوظبی سے کویت شہر تک اپنا نئے روٹ شروع کرنے کا اعلان کردیا ہے، نئی براہ راست پروازیں رواں سال اکتیس اکتوبر چلائی جائیں گی۔

اس تاریخی موقع پر ایئر عربیہ گروپ کے چیف ایگزیکٹو آفیسر عادل العلی نے کہا کہ ہمیں ابوظبی انٹر نیشنل ایئرپورٹ سے اپنے بڑھتے ہوئے نیٹ ورک میں کویت کا خیر مقدم کرتے ہوئے خوشی محسوس ہورہی ہے، کویت سٹی کو ائیر عربیہ ابوظبی کے نیٹ ورک میں شامل کرنا ہمارے اس عزم کی عکاسی کرتا ہے کہ ہم ٹریول سپورٹ کے لئے ہمہ وقت تیار ہیں۔

یہ بھی پڑھیں: ایئر عربیہ کو پاکستان کے دو شہروں کے لیے 4 پروازوں کی اجازت

انہوں نے کہا کہ ابوظبی کا شعبہ سیاحت اہنے صارفین کو دونوں شہروں کے درمیان سفر کرنے کے لئے ایک نیا اور سستا آپشن فراہم کررہا ہے۔

عادل العلی کا مزید کہنا تھا کہ صارفین اب ابوظی اور کویت کے درمیان چلنے والی براہ راست پروازوں کے ٹکٹس کو ائیرعربیہ کی ویب سائٹ اور کال سینٹر پر جاکر یا ٹریول ایجنسی کے زریعے بک کرایا جاسکتا ہے۔

واضح رہے کہ دو ہزار بیس کے بعد ائیر عربیہ ابوظبی نے پورے خطے میں کم وبیش 36 نئے روٹس تک اپنے کاروبار کو وسعت دی ہے، جن میں کویت،بیروت،مصر، بحرین، آذربائیجان، بھارت، بنگلادیش، ترکی، نیپال، بھوٹان، سوڈان، پاکستان، عمان، بوسنیا اور دیگر ممالک شامل ہیں۔

ہسپانوی اخبار نے اپنی ایک حالیہ رپورٹ میں روس کے صدر ولادیمیر پیوٹن پر قاتلانہ حملے میں بچ نکلنے کا دعویٰ کیا ہے۔

’یورو ویکلی نیوز‘ کے مطابق ولادیمیر پیوٹن پر حملے کی معلومات ٹیلی گرام پر جنرل ’جی وی آر‘ کے نام سے موجود چینل سے ریلیز کی گئیں تاہم اس میں حملے کا مقام نہیں بتایا گیا۔

ٹیلی گرام چینل کے مطابق روسی صدر کی گاڑی (لیموزین) کے اگلے ٹائر کو سڑک پر نصب دھماکا خیز مواد سے متاثر کیا گیا جس کے بعد گاڑی کے انجن سے دھواں اٹھنے لگا۔

مزید پڑھیں: یوکرینی شہریوں کے لیے روسی صدر پیوٹن کا بڑا قدم

ولادیمیر پیوٹن اس حملے میں محفوظ رہے اور انہیں فوری طور پر قافلے میں موجود بلڈ پروف گاڑی میں بیٹھا کر ان کی سرکاری رہائش گاہ منتقل کیا گیا۔ حملے کے بعد متعدد گرفتاریاں بھی عمل میں لائی گئیں۔

واضح رہے کہ فروری میں یوکرین پر حملے کے بعد سے روسی صدر کی صحت اور ان کی زندگی کو لاحق خطرات کی افواہیں سامنے آتی رہی ہیں۔ 2017 میں انہوں نے پانچ بار قاتلانہ حملے میں بچ نکلنے کا اعتراف کیا تھا۔

بھارت میں مودی سرکاری کی جانب سے تعلیمی اداروں میں حجاب کرنے پر پابندی کے بعد تقریباً 17 ہزار طالبات نے اسکول چھوڑ دیا۔

میڈیا رپورٹس کے مطابق سپریم کورٹ میں مسلم طالبات کے حجاب کرنے سے متعلق کیس کی سماعت ہوئی۔ پابندی کے خلاف دو درخواست گزاروں کے وکلا نے عدالت میں دلائل دیے۔

ایک درخواست گزار کے وکیل آدتیہ سوندھی نے مؤقف اختیار کیا: ’مسلم خواتین کو حجاب اور برقعہ وغیرہ پہننے کی وجہ سے امتیازی سلوک کا سامنا کرنا پڑ رہا ہے‘۔

انہوں نے نائیجیریا کی سپریم کورٹ کے حجاب سے متعلق فیصلے کا حوالے دیتے ہوئے کہا: ’حجاب کے خلاف کرناٹک ہائی کورٹ کا حکم نہ صرف مذہب کی آزادی، تعلیم کے حق کی خلاف ورزی کرتا ہے بلکہ آرٹیکل 15 کی بھی خلاف ورزی کرتا ہے‘۔

دوسرے درخواست گزار کے وکیل حذیفہ احمدی نے عدالت میں دعویٰ کیا کہ کرناٹک ہائی کورٹ کے فیصلے کے بعد سے 17 ہزار طالبات نے اسکول چھوڑ دیا ہے۔

جسٹس سدھانشو دھولیا نے وکیل سے پوچھا کہ کیا آپ کے پاس اس بات کا کوئی ثبوت ہے؟ اس پر حذیفہ احمدی نے پی یو سی ایل کی رپورٹ عدالت میں پیش کر دی جس کے مطابق حجاب پر پابندی کی وجہ سے 17 ہزار طالبات نے اسکول چھوڑ دیا اور وہ امتحان میں بھی نہیں بیٹھیں۔

وکیل نے عدالت سے کہا کہ حجاب پر پابندی کے فیصلے سے بہت سی طالبات تعلیم سے محروم ہوگئیں، کسی کا حجاب پہننا دوسرے کے لیے کیسے غلط ہو سکتا ہے؟ اگر کوئی حجاب پہن کر اسکول جاتا ہے تو کوئی دوسرا ناراض کیوں ہوگا؟

وکلا کے دلائل سننے کے بعد سپریم کورٹ نے کیس کی سماعت 19 ستمبر تک ملتوی کر دی۔