رواں ماہ پاکستان اور افغانستان کے مابین شارجہ میں 3 ٹی 20 میچوں کی سیریز کھیلی جائے گی، اس سیریز میں پاکستان کرکٹ بورڈ نے بابر اعظم کو آرام دینے کا فیصلہ کیا ہے۔
ذرائع کے مطابق افغانستان کے خلاف سیریز میں پی سی بی نے کپتان بابر اعظم کو آرام دینے کا فیصلہ کیا ہے جبکہ ٹیم کی کپتانی شاہین شاہ آفریدی کو دیئے جانے کا امکان ہے۔
دوسری جانب افغانستان کے خلاف ٹی 20 سیریز میں پاکستان اسکواڈ میں تین وکٹ کیپرز حسیب اللہ (پشاور زلمی )، اعظم خان ( اسلام آباد یونائیٹیڈ ) اور محمد حارث ( پشاور زلمی ) کو شامل کئے جانے کا بھی امکان ہے۔
واضح رہے کہ پاکستان سپر لیگ کے بعد افغانستان سےسیریز شارجہ میں ہوگی، افغانستان کےخلاف 3 ٹی 20 میچز کی سیریز شارجہ میں 24 ، 26 اور 27 مارچ کو کھیلی جائے گی۔
پاک افغان سیریز کے لیے قومی سلیکشن کمیٹی کے سربراہ ہارون رشید آئندہ چند روز میں اسکواڈ کا اعلان کریں گے۔
