راولپنڈی : پاک فوج کی رحیم یار خان اور صالح پٹ میں فوجی تربیتی مشقوں کا آغاز ہوگیا، کور کمانڈر کراچی لیفٹیننٹ جنرل ہمایوں عزیز نے تربیتی مشقوں کا مشاہدہ کرتے ہوئے جوانوں کی آپریشنل تیاریوں اورتربیتی معیارکوسراہا۔
پاک فوج کے تعلقات عامہ کے شعبے ( آئی ایس پی آر) کے مطابق پاک فوج کی رحیم یار خان اور صالح پٹ میں فوجی مشقیں شروع ہوگئیں، کور کمانڈر کراچی لیفٹیننٹ جنرل ہمایوں عزیز نے تربیتی مشقوں کا مشاہدہ کیا۔
آئی ایس پی آر کا کہنا ہے کہ فوجی مشقوں میں کراچی اور پنوں عاقل کے جوان حصہ لے رہے ہیں ، کور کمانڈر نے جوانوں کی آپریشنل تیاریوں اور تربیتی معیار کو سراہا۔
یاد رہے چند روز قبل پاک فوج کے سپہ سالار جنرل قمر جاوید باجوہ نے جہلم کے قریب فیلڈ فائرنگ رینج کے دورہ کیا تھا، اس موقع پر آرمی چیف جنرل قمر جاوید باجوہ نے کہا تھا کہ دشمن کو ہرطرح کے خطرات میں مؤثر جواب دینے کیلئے تیار ہیں، پاکستان کی سلامتی کیلئے تمام اقدامات بروئے کار لائیں گے۔
آرمی چیف نے اسٹیٹ آف دی آرٹ وی ٹی فور ٹینک کا عملی مظاہرہ دیکھا اور کہا تھا کہ مادر وطن کے دفاع کیلئے اندرونی اور بیرونی چیلنجز پر توجہ مرکوز ہے۔
