The news is by your side.

Advertisement

ماضی کی فلموں کے مقبول ہیرو اعجاز درانی انتقال کرگئے

لاہور : پاکستان فلم انڈسٹری کے سینئر اداکار اعجاز درانی انتقال کر گئے، معروف اداکار اعجاز درانی طویل عرصے سے بیمار تھے۔

ماضی کے مقبول فلمی اداکاراعجاز درانی ملکہ ترنم نورجہاں کے شوہر بھی تھے انہوں نے بہت سی لازوال فلموں میں کام کیا اور بحثیت ہیرو بہت سی کامیاب فلمیں کیں جن میں زرقا ، لاکھوں میں ایک اور ہیر رانجھا قابلِ ذکر ہیں، فلم “ہیر رانجھا” میں انہوں نے مرکزی کردار ادا کیا تھا۔

فلم ساز داؤد چاند کی اردو فلم ’مرزا صاحباں‘ میں بھی وہ سائیڈ ہیرو تھے۔ تاہم 1957 کی ریلیز فلم ’بڑا آدمی‘ میں بطور ہیرو ان کی پہلی فلم تھی جسے ہمایوں مرزا نے ڈائریکٹ کیا۔

اداکار اعجاز درانی 1935 میں گجرات جلال پور جٹاں کے علاقے میں پیدا ہوئے، ان کی عمر 88 برس تھی، انہوں نے 150 سے زائد فلموں میں اداکاری کے جوہر دکھائے، مولا بخش ان کی آخری فلم تھی، بطور اداکار، پروڈیوسر، ڈائریکٹر، اور ڈسٹری بیوٹر فلم انڈسٹری میں ان کی اہم خدمات رہیں۔

اداکار اعجازدرانی نے معروف گلوکارہ نور جہاں کے ساتھ پہلی شادی کی تھی، جس سے ان کی تین بیٹیاں پیدا ہوئیں، دوسری شادی اداکارہ فردوس سے کی لیکن دونوں شادیاں طلاق پر ختم ہوئیں، مرحوم پاکستان فلم پروڈیوسر ایسوسی ایشن کے وائس پریذیڈنٹ بھی رہ چکے ہیں۔

Comments

یہ بھی پڑھیں